1,500 Бардыгы /

Ташкент аэропортунда бажычылар Стамбулдан учуп келген журналист Махмуд Ражабдын уюлдук телефонун жана жанындагы оппозициялык саясатчы Мухаммад Салихтин 26 китебин алып коюшту. Ал 22-25-март күндөрү Тбилисиде өткөн Европалык тилектештик борборунун семинарына катышып келаткан.

Махмуд Ражабдын айтымында, ал Тблисиден Ташкентке Стамбул аркылуу учмак, ошондуктан Түркияда жашап жүргөн өзбек акыны, оппозициялык «Эрк» партиясынын лидери Мухаммад Салих менен жолуга келген.

«Мухаммад Салихтин инилери менен тарапташтары анын китептерин ала келишимди өтүнүшкөн. Ошондуктан мен Стамбулга учаарда акын менен байланышып, анда 3-4 саат бош убактым болорун айткам», — деди Махмуд Ражаб.

Бирок журналисттин айтымында, Ташкент аэпортундагы бажы кызматкерлери анын жанындагы бардык китептерди жана уюлдук телефонун алып коюшкан.

«Тинтүү учурунда алар эч нерсе таба алышкан жок. Сурак бөлмөсүнөн чыксам бажычылар менен аэропорт кызматкерлери Мухаммад Салихтин китептерин кызыгуу менен окуп жатышыптыр. Алар ал чынында эле 1991-жылы президенттикке талапкер болгонбу деп сурашты», — деди журналист.

Өзбекстандын Мамлекеттик Бажы кызматынын басма сөз кызматы азырынча бул окуя боюнча эч кандай комментарий бере элек.

www.