1,321 Бардыгы /

Ташкентте мурдагы прокурор Рашид Кадыров жана аны менен кошо айыпталып жаткан 12 аткаминердин соттук отурумунда соттолуучулардын айрымдары психологиялык жана физикалык кыйноолорго кабылганын билдиришти.

“Азаттыктын” өзбек кызматы жеке булактарына таянып кабарлагандай, башкы прокурордун мурдагы орун басары Улугбек Суннатов тергөө учурунда аны таяк менен сабашканын, күнөөсүн мойнуна алуудан баш тартканда электрошокер колдонушканын айткан.

– Суннатов кыйноолорго чыдабай, асынып алууга аракет жасаптыр. Бирок түрмө күзөтчүлөрү билип калып, аны жылаңач чечиндирип, беш күн карцерге отургузуп коюшкан, – деди сот жараянына катышкан булактардын бири.

Башкы прокуратуранын уюшкан кылмыштуулук жана коррупция менен күрөшүү башкармалыгынын мурдагы жетекчиси Улугбек Хуррамов болсо кызын жер төлөгө камайбыз деп коркутушканын, буга байланыштуу Рашид Кадыровго каршы көрсөтмө берүүгө аргасыз болгонун билдиргени айтылууда.

Улугбек Хуррамов тергөөчүлөр аны катуу сабап, колун, бутун сындырышканын белгилеп, медициналык экспертиза талап кылган.

10-апрелде Amnesty International (AI) эл аралык укук коргоо уюму Өзбекстандын мурдагы башкы прокурору Рашид Кадыровду кыйноого алуу ыктымалдуулугуна байланыштуу тынчсыздануусун билдирген. Бир күндөн кийин Өзбекстан башкы прокуратурасы Кадыров жана кылмыш ишинин башка фигуранттары ур-токмокко алынбаганын айткан.

Өзбекстандын башкы прокуратурасын 15 жыл башкарып, 2015-жылы апрелде кызматтан алынган 67 жаштагы Рашид Кадыров былтыр 22-февралда кармалган. Ал «опузалоо», «кызмат абалын кыянат пайдалануу» жана «пара алуу» беренелери менен айыпталууда.

www.