964 Бардыгы /

ТАШКЕН. Кыргызстандын Тышкы иштер министринин орун басары Азизбек Мадмаров жетектеген делегация Маңзаттарга көзөмөл боюнча Аймактык алака боюнча Меморандумдун Ташкен шаарындагы 11-жолугушуусуна катышты.

Иш-чараны Өзбекстандын Тышкы иштер министри А. Камилов жана БУУнун маңзаттар жана кылмыштуулук боюнча Башкармалыгынын аткаруучу директору Ю.Федотов ачышты. Жолугушуу маалында Азербайжандын, Казакстандын, Кыргызстандын, Орусиянын, Тажикистандын, Өзбекстандын Тышкы саясий ведомстволорунун жетекчилери, Түркмөнстандын Ички иштер министринин орун басары террроризм жана маңзаттарды мыйзамсыз жүгүртүү жаатында өз ара маалымат алмашышты. Ал эми Кыргызстандын Тышкы иштер министринин орун басары Азизбек Мадмаров Кыргыз Өкмөтү тарабынан азыркы чакырыктарга жана коркунучтарга каршы көрүлүп жаткан чаралар туурасында баяндап, бул өңүттө өлкө Эл аралык уюмдар алдындагы милдеттенмелерин кыйшаюусуз аткарып жаткандыгын баса белгиледи. Соңунда атайын Декларацияга дагы кол коюлду.

Айтмакчы, Маңзаттарга көзөмөл боюнча Аймактык алака боюнча Меморандумдун 1996-жылы майда Ташкен шаарында негизделген. Ага Борбор Азия өлкөлөрүнүн бардык Президенттери кол коюшкан. А Меморандумга 1998-жылы Орусия, а 2001-жылы Азербайжан дагы кошулган.

Алишер ТОКСОНБАЕВ, өз кабарчыбыз