1,578 Бардыгы /

ОШ. Кыргызстандын Түштүк башкалаасынын мэри Таалайбек Сарыбашов Улуу Ата Мекендик согуштун 95 жаштагы ардагери Жолдошбай Адаевдин, 94 жаштагы Салахидин Токтобаевдин үйлөрүнө барып, УлууЖеңиштин 74 жылдыгы менен экөөнү тең чын ыкласынан куттуктады.

Ардагерлерден кабар алган калаа башчысы ар бирине 10 миң сомдон акчалай сыйлыктарын жана майрамдык белек-бечкектерин дагы тапшырды.

– Сиздер Улуу Ата Мекендик согуштун жана ооруктун ардагерлери баатырларыбыздын өлбө-өчпөс эрдигин унуттурбай, жаштарды азыр дале эрдик кешыктандырып, мекенчилдик сезимдерин ойготуп келатасыздар. Ал эми биздин ыйык милдетибиз – ардагерлерибизди урмат-сыйга бөлөп, ар-тараптан камкордук көрүү. Ар-бириңиздерге бекемден-соолук, бакубат жашоо, аманчылык гана каалаймын! Кан-жаныңыздарды аябай,сактап калгантынчтык үчүн, Улуу Жеңиш үчүн Сииздерге башыбызды терең ийип, бекем таазим гана кылабыз! – деди Ош шаарынын мэри Таалайбек Сарыбашов.

Ал эми аталган ардагерлер шаар жетекчисине аларга көрсөткөн камкордуктар үчүн терең ыраазычылыгын билдиришип, өлкөбүздө түбөлүк тынчтык жана бейпилдик өкүм сүрүшүн гана тилешти.

Айтмакчы, быйыл Улуу Жеңиштин 74 жылдыгына карата Ош шаарынын жергиликтүү бюджетинен согуштун ардагерлерине 10миң сомдон, ал эми ооруктун каармандарына 5 миң сомдон ажыратылган. Ушул тапта Ош шаарында жалпысынан согуштун жети ардагери, ал эми ооруктун он тогуз каарманыгана жашайт.

Алишер ТОКСОНБАЕВ, өз кабарчыбыз