1,224 Бардыгы /

БИШКЕК. Кыргыз Республикасынын Президенти Сооронбай Жээнбеков Бишкек шаарындагы Токтоболот Абдумомунов атындагы Кыргыз улуттук академиялык драма театрына жана Чыңгыз Айтматов атындагы Мамлекеттик улуттук орус драма театрына баш бакты.

 Аталган театарлардын чыгармачылык пландары, театрлардын абалы жөнүндө Президентке театрлардын жетекчилери жана маданият, маалымат жана туризм министри Азамат Жаманкулов айтып беришти.

                        Андан соң Кыргыз улуттук академиялык драма театрынын директору Асылбек Өзүбеков маалымдагандай, театр 1926-жылдын 2-ноябрында негизделген. Театрдын имараты 1972-жылы пайдаланууга берилген. Акыркы жолу оңдоп-түзөө жараянына 2010-жылы 8 миллион сом ажыратылган. Ушул тапта имарат оңдоп-түзөө иштерине жана материалдык-техникалык базасын жаңылатууга 76 миллион сомдон ашуун акча каражатына муктаж. Мамлекет башчысы чыгармачыл жамаатын  репетициясына дагы күбө болду. Асылбек Өзүбеков театрда тапкан каражаттардан жылына алты спектаклдин бет ачаары тартууланып, орточо эсеп менен жаңы спектаклди чыгаруу үчүн 2 миллион сомго жакын акча каражаты жумшалаарын айтты.

                        Ал эми Мамлекеттик улуттук орус драма театрынын директору Евгений Кузнецовдун маалымдашынча, театр 1935-жылы негизделген. Акыркы жолу 2016-жылы чатырын жабуу максатында ички каражаттан 150 миң сом акча каражаты бөлүнгөн. Мындан тышкары, 2015-жылы бюджеттин эсебинен коомдук ажатканасын оңдоо ишине 1 миллион сом акча каражаты бажыратылган. 1972-жылдан бери театрдын имараты капиталдык ремонт иштеринен өтө элек, материалдык-техникалык базасы дагы дээрлик эскирди. Бүгүнкү күндө капиталдык оңдоп-ттзөө иштерине 114 миллион сомдон ашуун акча каражаты керектелүүдө. Театр жылына 36 спектакль коюп, алардын ичинен 6сы жаңы спектаклдердин бет ачаары.

Мамлекет башчысы Сооронбацй Жээнбеков эки театрдын имараттарын көрүп чыгып, алардын тез арада капиталдык оңдоп-түзөө иштерин жүргүзүү үчүн жетиштүү каржылоону тездетиш керектигин баса белгиледи. Ал начар шартта эмгектенип келишкен, бирок ишине берилген чыгармачыл эмгек жамааттарына ийгилик гана тилеп, каржылоо маселелерин чечүгө көмөк көрсөтөөрүн убадалады.

                        Алишер ТОКСОНБАЕВ, өз кабарчыбыз