854 Бардыгы /

9-майда Казакстанда Facebook, Instagram социалдык түйүндөрүнө, YouTube сервисине, Telegram мессенджерине жана бир катар жаңылыктар сайттарына бөгөт коюлду. Бул тууралуу интернет эркиндигине мониторинг кылган эл аралык NetBlocks уюму билдирди.

Маалыматка караганда, дүйнөлүк желедеги өлчөө иштеринин жыйынтыгы айрым түйүндөр толугу менен өчүрүлгөндүгүн көрсөткөн.

«Алынган маалыматтар чектөөлөр провайдерлердин деңгээлинде бейшемби күнү эртең менен же шаршемби кечинде киргизилгенин көрсөттү», — деп жазылган уюмдун билдирүүсүндө.

Анда ошондой эле акыркы айларда Казакстанда мезгил-мезгил менен социалдык түйүндөргө чектөөлөр киргизилип келгени белгиленген. «Акыркы айларда казак бийлигинин чет өлкөдө бозгунда жүргөн Мухтар Аблязовдун түз эфирлерине чектөө киргизүү аракеттеринин фонунда социалдык түйүндөргө байма-бай бөгөт коюлуп келген. Бирок масштабы жагынан алар бүгүнкүгө жеткен эмес», — деп билдирди уюм.

9-май күнү эртең менентен тартып Казакстанда «Азаттыктын» казак кызматынын жана башка бир нече маалымат агенттиктердин сайттары ачылбай калган. Ага чейин өлкөдө тыюу салынган «Казакстандын демократиялык тандоосу» кыймылы дал ушул күнү «Өлбөс полк» менен катар митинг өткөргөнү жатканын кабарлаган. Буга байланыштуу полиция өлкөнүн Нур-Султан, Алматы, Актөбө жана Атырау шаарларында көчөгө чыккан бир нече кишини кармап кетти.

Казак бийлиги адамдардын кармалышы жана интернет-ресурстарга бөгөт коюлганы боюнча эч кандай комментарий берген жок. Бирок буга чейин бийлик жарандарды уруксат берилбеген нааразылык акцияларга чыкпоого чакырып, алардын катышуучулары жоопко тартыла турганын эскерткен. Өлкө президенти Касым-Жомарт Токаев да тынч жыйын өткөрүүгө уруксат алынышы керек экенин билдирген.

www.