1,528 Бардыгы /

КРнын ИИМнин буйруктарынын негизинде, 15-май «ИИОдо кызмат ѳтѳп жатып курман болгон кызматкерлерди эскерүү күнү» катары белгиленген.

Анын негизинде бүгүн Жалал-Абад ОИИБде маркум болгон милиция кызматкерлери эскерилди. Кызматтык милдетин аткарууда жана кылмышкерлерди кармоодо каза болгон кызматкерлердин эстелигине гүл коюлуп, бир мүнѳттүк эскерүү орун алды. Алардын коомдук коопсуздукту камсыз кылууда жана ѳзгѳчѳ оор кылмыштарга шектелгендерди, диний-экстремисттик террорчуларды кармоо учурунда жасаган эрдиктери даңазаланды. Милиция тарабынан уюштурулган иш-чарага маркум кызматкерлердин жубайлары жана жакындары да катышып, ОИИБ тарабынан аларга колдоо кѳрсѳтүлдү.

Маркум, кесиптеш, куралдашыбыз милициянын подполковниги А.Исмаиловдун жубайы Э. Тердикбаева ѳз сѳзүндѳ каза болгондорду унутта калтырбай, баатырдыгын даңазалап жаткан Жалал-Абад ОИИБнин жетекчилигине ыраазычылыгын билдирип ѳттү.

Аталган иш-чара жергиликтүү ШРИИБде дагы ѳткѳрүлүп, кызмат учурунда курман болгон кызматкерлердин рухтарына багышталып куран түшүрүлдү. Базар-Коргон РИИБи тарабынан ѳзгѳчѳ коркунуч туудурган кылмышкерди кармоо учурунда анын огунан 30 жашында каза болгон милициянын капитаны А. Махмадалиев жана 2010-жылы июнь коогалаңында каза болгон милициянын майору М. Сулаймановдун жакындарына 3000 (үч миң) сомдон материалдык жардам кѳрсѳтүлдү. Ал эми Таш-Кѳмүр ШИИБи 18 жыл ИИОдо кызмат ѳтѳгѳн милициянын капитаны С.Ашиевдин үй-бүлѳсүнѳн кабар алып, куран түшүрүп, белектерин берип кайтышты.

Жалал-Абад ОИИБнин басма сѳз кызматы