3,329 Бардыгы /

ЖАЛАЛ-АБАД. Жалал-Абад шаарындагы «Жалал-Абад стоматология» ААКта иштеген тиш дарыгерлери Рамазан айында бейтаптарды акысыз дарылоодо.

Аталган ишкананын 7 дарыгери биригип, орозо айында муктаж адамдарга тиштерин бекер дарылап берүү ишин баштаган.

Тиш дарыгери Фахриддин Саидмухидиновдун айтымында орозо айында сооп үчүн жана жардам көргөзүү максатында ушул демилгени көтөрүшкөн.

“Биз калк арасындагы муктаж адамдарга, тишин дарылоо үчүн каражаты, мүмкүнчүлүгү жокторду бекер дарылап жатабыз. Буга чейин Бишкек, Ош шаарларындагы кесиптештерибиз да ушул эстафетаны башташты. Анан биз да баштоону туура көрдүк, мындай акция орозо айы ичи уланмакчы. Себеби бир жагынан рамазан айында сооп да болот”-дейт Ф. Саидмухидинов.

Анын айтымында тишти жулдуруу, пломба койдуруу акысыз, ал эми тишти салдыруу 50% арзандатылган. Дарыланган бейтаптар ыраазы болуп, интернет баракчасы аркылуу көрүп келип жатышканын белгиледи. Азыркы учурда дагы бейтаптар менен кызуу иш алып жатышкандыгын айта кетти.

Кошумчалай кетсек, бир тишти 300-600 сомго жулуп беришет. Ал эми пломба койдуруу 600-2000го чейин болот.

Акылай КАРАБАЕВА, «Аймак»