729 Бардыгы /

ЫСЫК-КӨЛ. Кыргыз Республикасынын Президенти Сооронбай Жээнбеков бүгүн эки күндүк жумуш сапары менен Ысык-Көл облусун кыдырып жүрөт.

Сооронбай Жээнбеков адегенде эле Ысык-Көл районунун Чоң-Өрүктү айылындагы дыйкан чарбасынын иши менен кенен-чонон таанышты. Анда Дүйнөлүк Банктын “Сүт секторунун өндүрүмдүүлүгүн комплекстүү жогорулатуу” долбоору боюнча маалымат алды. Мындан тышкары, Ысык-Көл облусунун Түп райондук оорулардын алдын алуу жана мамлекеттик санитардык-эпидемиологиялык көзөмөлдөө борборуна баш бакты. Ошондой эле Түп айылындагы спорт комплекстин курулуш иштери менен дагы таанышты.

Түп районунун жашоочулары менен жолугушуусунда мамлекет башчысы сот-укуктук реформа, тышкы саясаттагы аткарылып жаткан иштер, аймактарды өнүкүрүү, өлкөнү туташ санариптештирүү өңдөнгөн долбоорлор жөнүндө кеңири баян этти. Сооронбай Жээнбеков президенттик шайлоо алдында берген убадаларынын аткарылышына дагы кеңири токтолду. Алар – калкты таза суу менен камсыздоо, ирригацияны өнүктүрүү, мугалимдердин жана дарыгерлердин социалдык абалдарын жакшыртуу, жемкорлукка каршы күрөш. Жергиликтүү жашоочулардын суроолоруна жооп берип жатып, Президент Кыргызстан ачык өлкө сыңары өнүгүп бараткандагын баса белгиледи.

– Биз ачык баарлашуудан улам өнүгөбүз. Бетме-бет отуруп, баарын ачык сүйлөшсөк, теңирден тескери көрүнүштөр улам азайып, жакшы нерселер жеңе баштайт. Ачык коом мына ушунусу менен жакшы. Коом, мамлекет өнүксүн, демократия оожалсын деген максатта сөз эркиндигин дагы бекем коргоп жатабыз! Сот-укуктук реформа ишке киришсе – бардыгы нукка салынат. Биздин максатыбыз – өлкөбүздү өнүккөн мамлекеттердин арасына ыкчам кошуу. Мен аткарылып жаткан жакшы иштер жөнүндө гана айтып бердим. Өлкөбүздү тынчтык, биримдик, ынтымак байырласа, мындан дагы чоң иштер аткарылат. Биздин буга көзүбүз жетип турат, реформаларга убакыт гана керек! – деп баса белгиледи мамлекет башчысы Сооронбай Жээнбеков.

Эл менен жолугушуу бүткөн соң Президент райондун аксакалы Абдыкалык Эгембердиев менен өзүнчө жолугушуп баарлашты. Президент Сооронбай Жээнбековдун Ысык-Көл облусуна жумушчу сапары эртең, 17-майда, Балыкчы шаарында улантылат.

Алишер ТОКСОНБАЕВ, өз кабарчы