1,136 Бардыгы /

 ОШ.«Достук» Кыргыз-Өзбек чек ара бекетинде он күндөн бери цемент ташыган жүздөн ашуун машине дагыле өтө албай турат.Айдоочулар буга дейре Өзбекстанга эч кандайтоскоолдуксуз эле цемент ташып иштеп жүрүшкөндүгүн, бул жолку чектөө туурасында эч бир органдан так маалымат ала албай жатышкандыгын айтып даттанышты.

         Мамлекеттик чек ара кызматы машинелер чек арадан өтүшпөгөндүгүн, алар «Достук» чек ара бекетине 200 метр жетпей турушкандыгын тастыктады. Аталган мекеменин басма сөз катчысы Гүлмира Бөрүбаева Кыргызстан жүктөрдү эч тоскоолдуксуз эле өткөрүп жаткандыгын билдирди. Бирок, айрым маалыматтарга караганда, Өзбекстан цементти ташууга чектөө киргизгендиги айтылууда. Бирок, Мамлекеттик бажы кызматынан аларда мындай маалымат жок экендигин, ушул тапта тактоо жараяны жүрүп жаткандыгын гана  айтышты.

            «Достук» Кыргыз-Өзбек чек ара бекетинен өтө албай турган айдоочулардын айтымында, Өзбекстан 12-майдан бери оор жүк ташуучу машинелерди өткөрбөй атат. Андыктан, ушул тапта «Достукта» 103 айдоочу 2610 тоннадан ашуун цементи менен дагыле турат. Шоопурлар айласы таптакыр куруганда Кыргызстандын Экономика министри Олег Панкратовго жана Кыргызстандын Өзбекстандагы Элчилигине кайрылышты. Бирок, мындан деле жакын арада жыйынтык чыкчудай түрү жок.

Алишер ТОКСОНБАЕВ, өз кабарчы