2,069 Бардыгы /

БИШКЕК. Мамлекет башчысы Сооронбай Жээнбеков буга дейре борбор калаабыздын бир катар маанилүү маданий обьектилерине баш баккан. Маселен, Токтоболот Абдумомунов атындагы Кыргыз улуттук академиялык драма театрына жана Чыңгыз Айтматов атындагы Мамлекеттик улуттук орус драма театрына сапарлган. Эми минтип Токтогул Сатылганов атындагы Кыргыз улуттук филармониясын дагы кыдырды.

Филармониянын имаратындагы ремонт тууралуу Президентке маданият, маалымат жана туризм министри Азамат Жаманкулов, ошондой эле филармониянын башкы директору Кыргызбай Осмонов кенен-чонон айтып беришти. Ал эми айлана-чөйрөсүн жакшыртуу жаатындагы маалыматты Бишкек шаарынын мэри Азиз Суракматов жасады. Алар маалымдашкандай, филармониянын имаратындагы ремонт толугу менен бүткөрүлдү. Фойе жана сахна толук реставрацияланып, жарык жана үн берүү системалары, жылытуу түйүнү, артисттердин грим бөлмөлөрү оңдолуп-түзөлдү. Министр Азамат Жаманкулов белгилегендей, учурда сметалык документация жыйынтыкталып, Опера жана балет театры, Кыргыз жана Орус драма театрларынын ремонтуна тендер дагы жарыяланды. Президент Сооронбай Жээнбеков имаратты бир сыйра кыдыргандан кийин борбор калаанын маданият обьектилерине мындан ары мамлекеттик даражада өзгөчө көңүл бурулаарын убадалады. Бул жылы Абдылас Малдыбаев атындагы Кыргыз улуттук академиялык опера жана балет театры, Токтоболот Абдумомунов атындагы Кыргыз улуттук академиялык драма театры, Чыңгыз Айтматов атындагы Мамлекеттик улуттук орус драма театры бүтүндөй ремонттолот.

Ошентип, Маданият, маалымат жана туризм министрлигинин маалыматына ылайык, аталган драма театрларынын имараттары 1970-1972-жылдары пайдаланууга тапшырылган. Ошондон бери бир дагы жолу толугу менен ремонттолгон эмес. Опера жана балет театры акыркы жолу 1978-жылы гана ремонттолгон экен, 2016-2017-жылдарда жарым-жартылай оңдолуп-түзөлгөн. Филармония акыркы жылы 2007-жылы гана ремонттолгон.

Алишер ТОКСОНБАЕВ, өз кабарчы