2,180 Бардыгы /

2008-жылы курулушу башталып, кийин каражат жоктугунан токтоп калган райондогу жалгыз спорт комплекси качан бүтөт?

Ноокен районуна караштуу Масы айыл аймагында мындан 11 жыл мурда, тактап айтканда 2008-жылы эки этаждуу спорт комплексинин курулушу башталган. Негедир курулуш иштери бүгүнкү күнгө чейин бүтө элек.

-“Ноокен эли спортко аябай кызыгышат. Мисалы, стадиондо жаш балдардан тарта, чоң аялдарга чейин чуркап машыкканын көрчүмүн. Быйыл стадион жаңыланып жатат, аны менен бирге жанындагы спорт комплекси да бүтүп калабы деп тиленип турабыз. Биздин айылдан да балбандар, чемпиондор чыкса деген үмүтүбүз чоң” – дейт айыл тургуну Чачты Бокошева.

Ал эми Масы айыл өкмөтүнүн башчысы Жаныбек Эшенкулов имарат толук тургузулгандан кийин, курулуш токтоп калган, анын себеби каражат жоктугунан деп түшүндүрдү.

–Ортодо аркандай себептер менен республикалык бюджеттен каржы түшпөй токтоп калган. Жалпы 61 миллион сомго бааланган. 47 миллион сомдук жумуштар аткарылды. Азыр эми акыркы этаптагы аяктоочу жумуштарына дагф 13 миллион сом которулушу керек. Быйылкы жылга пландалган, эгерде каражат которулган болсо эле аз күндө бүтөт”.

Кошумчалай кетсек, Жалал-Абад областында эл аралык талаптарга жооп берген бир гана спорт комплекси бар. Ал Жалал-Абад шаарында жайгашып, “Газпромдон-Балдарга” программасынын алкагында курулган.

Ошондой эле, област аймагында быйылкы жылдын 6 ай ичинде эле  3 спорт залы, 2 футбол аянтчасы колдонууга берилген.

Ал эми жогоруда сөз болгон Ноокен районундагы спорт комплексин 2019-жылдын 31-августуна карата колдонууга берүү пландаштырылган.