1,605 Бардыгы /

2010-жылы июнь окуясында Базар-Коргон районунда болгон улуттар аралык кастыкты козгогон окуяда кызмат ѳтѳѳ учурунда зѳѳкүрлѳрдүн колунан милициянын майору Мыктыбек Сулайманов каза тапкан. Анын жаркын элесине арналган спорттук иш-чара бүгүн 14-июнда Базар-Коргон РИИБи тарабынан ѳткѳрүлүп, кызмат учурунда жасаган эрдиги, кызматтагы ѳзгѳчѳлүктѳрү, жѳнѳкѳйлүгү жана атына жараша мыкты инсан экендиги айтылды. Спорттук иш-чарага Базар-Коргон районунун аймагында жайгашкан бардык айыл ѳкмѳттѳрү активдүү катышып, ар улуттан куралган жалпы 17 команда 3 кичи-футболдук талаада 3 тайпага бѳлүнүп күч сынашышты. Жыйынтыгында жеңүүчү командага кубок, акчалай сыйлык Базар-Коргон РИИБнин атайын диплому тапшырылды. Ал эми калган командалар акчалай белектерди жана дипломдорду алышты. Спорттук таймаш менен район аймагындагы улуттар аралык ынтымак, достукту бекемдѳѳ, жаштар арасында кылмыштуулуктун алдын алуу, аларды патриоттуулукка, мекенчилдикке үндѳѳ максаты коюлган. Оюндун байге фонду 25 миң сомду түздү.

Жалал-Абад ОИИБнин басма сѳз кызматы