859 Бардыгы /

Швейцариянын Башкы прокуратурасы Гүлнара Каримовго байланыштуу козголгон кылмыш ишинин негизинде алынган 133 миллион долларды Өзбекстанга кайтарып бергени жатат.

“Алты жылдан бери аягына чыкпай келаткан татаал кылмыш ишин тергөөдө Башкы прокуратура Өзбекстанда иш кылууну каалаган чет өлкөлүк компаниялардан ири суммада акча мыйзамсыз алган схема болгонун аныктады. Ал каражаттар чет өлкөдө, тактап айтканда Швейцарияда адалданган. Ошондуктан камакка алынган каражаттар Өзбекстанга кайтарылат”, деп жазылат башкы көзөмөлдөөчү органдын расмий сайтында.

Швейцарияда Өзбекстандын мурдагы президенти Ислам Каримовдун кызы Гүлнарага байланыштуу кылмыш иши 2012-жылы козголгон. Анын банктагы эсебиндеги 784 миллион доллар камакка алынган. Ислам Каримовдун бийлигинин тушунда өзбек өкмөтү бул акчаны кайтарып алууга бир канча жолу аракет кылган.

Мунун алдында камактагы Гүлнара Каримова чет өлкөдөгү байлыгынан баш тартарын айтып, азыркы президент Шавкат Мирзиёевге кайрылды. Кайрылууну кызы Иман «Инстаграмдагы» баракчасына жарыялады. Анда Каримова Мирзиёевден «гумандуулук кылуусун» өтүнгөн жана чет өлкөлөрдөгү банктарда сакталып турган 686 миллион доллар акчасынан баш тарта турганын билдирген.

Каримова азыр жаза мөөнөтүн Ташкент облусундагы №21 аялдар түрмөсүндө өтөп жатат. Бул жайга ал ушул жылдын март айында үй камагынан которулган.

46 жаштагы Гүлнара Каримова 2017-жылы Ташкент облустук сотунун өкүмү менен 10 жылга эркинен ажыратылган. Кийин бул өкүм беш жылга кыскартылган. Ага «Алдамчылык», «Чет элдик валютаны жашыруу», «Бажы мыйзамдарын бузуу», «Кылмыштуу жол менен табылган кирешени мыйзамдаштыруу» сыяктуу беренелер менен айыптар коюлган.

www.