1,175 Бардыгы /

НАРЫН. Кыргыз Республикасынын Өкмөтүнө караштуу Суу ресурстары мамлекеттик агенттигинин директору Көкүмбек Таштаналиев Ала-Буга, Жаман-Даван  жана Куртка дарыяларындагы суу обьектилерин куруу жана калыбына келтирүү боюнча пландар туурасында кеңири баян этти. 
Суткалык жөнгө салуучу бассейндерди куруу жана азыр пайдаланылып жаткан ирригациялык каналдарды калыбына келтирүү каралууда. Ар бир дарыя боюнча өзүнчө техникалык-экономикалык негиздемелер даярдалып, аларды каржылоого Европа Реклонструкциялоо жана Өнүктүрүү Банкы сыяктуу эл аралык каржы  институттарын тартуунун үстүндө иштер катуу жүрүп жатат. Долбоорлор 2020-жылдан тартып жүзөгө ашырыла баштайт. Алардын аякташы менен Ак-Талаа районунда кошумча 4000 гектардан ашуун жерге сугат суу жетип, пайдаланылып жаткан сугат жерлерди сугарууну жакшыртууга мүмкүнчүлүк жаралат.
Мамлекет башчысы Сооронбай Жээнбеков ирригация тармактарын модернизациялоо жана кеңейтүү аймактык өнүктүрүү саясатынын ажырагыс бөлүгү экендигин жашырган жок. Ал дыйкандарды сугат суу менен камсыздоо айыл чарбасын жана аймактарды комплекстүү өнүктүрүүнүн ачкычтарынын бири, дыйкан эмгегинин негизи экенин баса белгиледи.
Соңунда тийиштүү мамлекеттик органдарга аймактарды өнүктүрүү боюнча Эл аралык өнөктөштөрдү байма-бай тартуу менен бул маселени чечүүнү ыкчамдатуу жагы катуу сунушталды.

Алишер ТОКСОНБАЕВ, өз кабарчыАа