731 Бардыгы /

БИШКЕК. Кыргыз Республикасынын Президенти Сооронбай Жээнбеков «Эркин Европа-Азаттык» үналгысынын Президенти Джейми Флайды кабыл алды. Мамлекет башчысы Джейми Флайды жаңы кызматка дайындалышы менен чын ыкластан куттуктады жана анын ишмердүүлүгүнө ийгиликтерди гана каалады.

Президент баса белгилегендей, Кыргызстан демократиянын принциптерин жана ачыктыкты абдан жогору баалайт. Өлкөдө жалпыга маалымдоо каражаттарынын эркин жана толуккандуу иштөөсү үчүн бардык зарыл шарттар жаратылган.  Сооронбай Жээнбеков сөз эркиндигин бекемдөө күчтүү жана ачык жарандык коомду куруунун, өлкөнү өнүктүрүүнүн башкы негиздеринин бири экендигин дагы баса белгиледи. Ошондой эле медиа өкүлдөрү дагы өз ишине, сөзүнө, адам тагдырына жогорку деңгээлдеги жоопкерчилик менен мамиле кылыш керектигин дагы кошумчалады.

«Эркин Европа-Азаттык» үналгысынын Президенти Джейми Флай Кыргызстандагы оң маанайдагы демократиялык  жараяндарды, ачыктыктын деңгээлин жана сөз эркиндигин канааттануу менен белгиледи. Ал «Эркин Европа-Азаттык»  үналгысыны өлкөбүздөгү ийгиликтүү ишмердиги ачыктык жана ЖМКлар үчүн түзүлгөн шарттар менен жаратылгандыгын кошумчалады.

Жолугушуунун жүрүшүндө сөз эркиндигин мындан ары дагы бекемдөө чаралары, демократиялык коомду курууда ЖМКнын ролу тууралуу пикирлер алмашылды.

Алишер ТОКСОНБАЕВ, өз кабарчы