961 Бардыгы /

БИШКЕК. Президент Сооронбай Жээнбеков Үсөнбек Ниязбековдун апасы Өктөм Мамаева, жубайы Назира Базарбаева, бир тууганы Асанбек Ниязбеков жана уулу —Тимур Ниязбеков менен жолугушту.

Мамлекет башчысы адегенде 2019-жылдын 7-августундагы окуяларда курман болгон Кыргыз Республикасынын Улуттук коопсуздук мамлекеттик комитетинин кызматкери, полковник Ниязбековдун жакындарына көңүл айтып, Үсөнбек бүт өмүрүн Мекенге ак кызмат кылуу, жарандардын коопсуздугун жана өлкөбүздөгү коомдук тартипти камсыздоого арнагандыгын баса белгиледи. Террористтик түзүмдөрдү жок кылуу боюнча бир катар операцияларга ийгиликтүү катышып, улуттук коопсуздук органдарын түрдүү ведомстволук сыйлыктарына татыган. Сооронбай Жээнбеков Үсөнбек Ниязбековдун курман болушу анын үй-бүлөсү, жакындары гана эмес, мамлекет үчүн дагы чоң жоготуу болгондугун баса белгиледи. Президент Ниязбековдун жакындарына «Эрдик» медалын тапшырды.

Кыргыз Республикасынын Президентинин Үсөнбек Ниязбековду аскердик милдетин аткаруудагы көрсөткөн жеке каармандыгы үчүн «Эрдик» медалы менен сыйлоо (курман болгон соң) жөнүндөгү Жарлыгына Кыргыз Республикасынын Көз карандысыздыгы күнүндө кол койгон. Үсөнбек Ниязбековдун апасы өлкөдө тынчтык жана туруктуулук болуп, энелердин көз жашы төгүлбөсүн деген каалоосун билдирди. Өктөм Мамаева Мамлекет башчысына Кыргызстан элинин бакубатчылыгы үчүн гана жемиштүү иштөөнү тиледи.

Алишер ТОКСОНБАЕВ, өз кабарчы