1,167 Бардыгы /

ТАЖИКСТАН. Кыргыз Өкмөтүнүн Баткен облусундагы ыйгарым укуктуу өкүлү Акрам Мадумаров жетектеген делегация Тажикстандын Согди облусунда болду. Делегация Тажикстан Республикасынын Эгемендүүлүк майрамынын урматына уюштурулган чоң салтанатка катышты. 

Жогорку деңгээлде уюштурулган иш чарада Согди облусунун аткаруу бийлигинин төрагасы Раджоббой Ахмадзода Баткен облусунун жетекчилигин 31-августта белгиленген Эгемендүүлүктүн 28 жылдыгы менен куттуктап, тажик таланттары тарабынан  кыргыз ыр-бийлери тартууланды. Майрамдык салтанаттан соң  Акрам Мадумаров менен Раджоббой Ахмадзода официалдуу түрдө жолугушуп, эки тараптуу кызматташуу, кошуналык мамилелерди чыңдоо жаатында сүйлөшүштү. Адегенде Акрам Мадумаров Тажик кесиптешин жана жалпы Тажикстандын, мунун ичинде Согди облусунун элин эгемендүүлүк майрамы менен чын ыкластан куттуктап, “Кыргызстан менен Тажикстандын  бактысы жана дөөлөтү – “Эгемендүүлүгү”  экендигин баса белгилеп, 28 жыл аралыгында эки мамлекет тең өнүгүүнүн туура жолун таба алды деп белгиледи.  Ошондой эле Баткен-Согди облустарынын элинин, ынтымагы, достугу, карым катнашы кылымдарды карыткан, мындан ары да кошуналык алаканы бекемдөө, эки облустун ар тараптуукызматташуусун мындан ары дагы өнүктүрүү,чек аралаш аймакта элдин коопсуздугун камсыз кылуу менен, жаралган маселелерди  өз ара сүйлөшүү жолу менен чечүүгө жетише беребиз” деген пикирин билдирди.  Ошол эле учурда Согди облусунун башчысы Раджоббой Ахмодзода бүгүнкүдөй жолугушуулар, улуу муундардан мурас калган эки элдин ынтымагы менен достугун чыңдоого, эки тараптуу кызматташууну, дагы бекемдөөгө шарт жаратаарын белгиледи. Тараптар акыркы учурда Кыргызстан менен Тажикстандын чек аралаш аймактарында орун алып жаткан түшүнбөстүктөрдү жоюу, ар бир окуя боюнча дыкат иликтөө жүргүзүү,чыр-чатактарды болтурбоо максатында алдын алуу иш чараларын күчөтүүнү катуу макулдашышты.

Жолугушуу Кыргызстандын Президенти Сооронбай Жээнбеков менен Тажикстандын Президенти Имомали Рахмондун буга чейинки  жумушчу жолугушуусунда жетишилген  макулдашууларга ылайык өткөрүлдү.

Алишер ТОКСОНБАЕВ