АЗИЯНЫН ЧЕМПИОНУ-АКСЫДА

1,493 Бардыгы /

«Спорт – ден соолуктун булагы, ийгилик –ынтымактын башаты»-демекчи, спорт менен машыгып, сергек жашоо мүнөзүн алып жүрүү баарыбыздын эле көнгөн адатыбыз.

Баарыбыз билгендей эле спорт ар кандай дене тарбиялык көнүгүүлөр боюнча окуу-машыгууну жана мелдештерди уюштуруу жана өткөрүү системасы. Спорт биздин ден соолугубуздун чың болушу менен бирге чечкиндүүлүктү, туруктуулукту, тартиптүүлүктү, башкаларды жана өзүн өзү сыйлоону, жеңишке умтула билүүнү жана башка да не бир асыл сапаттарды үйрөтөт. Спорт баарына белгилүү болгондой эле байыртадан бери келе жаткан каада-салтка кирет десек жаңылышпайбыз. Улуттук спорт оюндар тээ бабаларыбыздан бери келе жатат, аларды эске салсак ак чөлмөк, аркан тартыш, кыз куумай, жоолук таштамай, топ таш, тогуз коргоол, оодарыш, улак тартыш, тогуз коргоол, селкинчек, жамбы атмай, алыш күрөш жана башкалар. Улуттук оюндардан айырмаланып спорт жаатында эрежесиз эр уруш да бар. Бул оюн укканга оңой угулганы менен, иш жүзүндө, мелдешке чыкканда же машыгуу учурунда оңой болбойт. Кандай гана күч жумшалары баарыбызга айдан ачык көрүнүп турат.

Аксыдан чыккан өлкөбүздүн желегин желбиреткен эрежесиз эр уруш боюнча Азиянын чемпиону Жаныбек уулу Каныбек жана алыш күрөш боюнча Азиянын үч жолку чемпиону Шаршенаалы уулу Мадаминбек Аксы эли менен жолугушуу аземине келишти. Жогоруда айтылган Жаныбек уулу Каныбек эрежесиз эр уруш боюнча 100дөн ашуун мамлекеттердин ичинен Кыргызстанды таанытып, желегибизди желбиретип, Азиянын чемпиону аталып олтурат. Өзү Аксы районундагы Ак-Суу айыл өкмөтүнүн Ак-Сай айылында 1995-жылы 5 бир туугандын 4-сү болуп жарык дүйнөгө келген. Мектепте жүргөндө эле спортко кызыгып, өзү теңдүүлөр менен күрөшүп күчүн сынап жүрчү. Окуусун аяктап мекенге салым кошуп армияга барган. Армиядан келгенден кийин көчөдө жүргөндө балдар менен бир аз чыр чыгып кетсе эле урушуп,уруп коюп, кийин ММАга күчүн сынап көрүү максатында кирип, биринчи жолку урушта эле Кыргызстандын чемпиону болгон. 2015-жылдан бери катышып келет, төрт жылдын ичинде көптөгөн мамлекеттерге Москва, Казакстан, Таджикстан, Өзбекстан, Украина жана башка өлкөлөргө мелдешке барып, куру кайтпай жеңүүчү аталып, кыргызды башка өлкөлөргө таанытып, көптөгөн ийгиликтерди багындырып келген. Бул агабызды баатыр десек да жарашат. Өз кесибинен 10 жолку оюндун жеңүүчүсү болуп, эки жолу жеңилүүгө дуушар болгон. Албетте, спорттун бул түрүнө катышканда башында ата-энеси, үй-бүлөсү каршы болушкан, коркунуч жаратат эмесби. Максатына жетүүнү көздөп, айтканынан кайтпай, бир топ ийгиликтерди багындыргандан кийин, ата-энеси да батасын берип, колдомой болушту.

Алдыдагы максаттарына жетип, дагы да ийгиликтерди багындырып, алакандай болгон кыргызды дүйнөгө таанытышына, дүйнөнүн чемпиону болушуна баарыбыз тилектеш бололу. Аксыдан дагы да ушундай патриот, эли-жерин сүйгөн эр жүрөктөр, чыгармачыл, баатыр, даанышман, элдин керегине жараган мыкты кыз-уландар чыкса дейм.