1,052 Бардыгы /

БАТКЕН. Кыргызстан Тажикстан жана Өзбекстан мамлекеттеринин жарандык коргонуу кызматтарынын биргелешкен машыгуусу Баткен шаарында өткөрүлдү.

“Баткен облусунун аймагында өзгөчө кырдаалдар пайда болгондо Кыргызстандын, Өзбекстандын жана Тажикстандын аймактык бөлүмдөрүнүн, күч жана каражаттарынын башкаруу органдарынын көмөктөшүүсү” темасында өткөн бул эл аралык биргелешкен машыгууга аталган үч өлкөнүн бардык жарандык коргонуу кызматтары толук кандуу катышышты. Машыгуунун жүрүшүндө өзгөчө кырдаалдар катталган учурда кооптуу аймактан элди эвакуациялоо, лагерлерди уюштуруу, жабыркагандарга алгачкы медициналык жардамдарды көрсөтүү, куткаруучулар жана башка бардык кызматтар, өзгөчө кырдаалдардын кесепеттерин жоюу аракеттерин көрсөтүштү.

Машыгууга катышкан Кыргыз Өкмөтүнүн Баткен облусундагы ыйгарым укуктуу өкүлү Акрам Мадумаров машыгуунун абдан ийгиликтүү аякташы менен бардык жарандык коргонуу кызматтарын куттуктады: – Өзгөчө кырдаалдар чек араны билбейт. Ошондуктан, кандай гана кырдаал болбосун биргеликте аракеттенүүбүз керек. Мындай окуялар машыгууларда гана болсун!

Буга улай Кыргыз Өкмөтүнүн Баткен облусундагы ыйгарым укуктуу өкүлү Акрам Мадумаров машыгууга активдүү катышкан жана буга чейинки жарандык коргонуу кызматтарында үзүрлүү кызмат өтөгөн кызматкерлерди сыйлоо менен коңшулаш үч өлкөнүн Улуттук Кызыл Жарым Ай Коомунун өкүлдөрүн, машыгууну өткөрүүдөгү колдоосу үчүн терең ыраазычылыгын билдирип, Ардак грамоталарын тапшырды. Аталган Эл аралык машыгуу кандай гана өзгөчө кырдаал болбосун, коңшулар биргеликте аракеттенүүгө даярдыгын айгинеледи.

Алишер ТОКСОНБАЕВ, өз кабарчы