784 Бардыгы /

Өзбек чалгынчылары активисттер менен диссиденттерге каршы киберчабуулдарды жасоо үчүн тыңчылык инструменттерин колдонушкан. Бул тууралуу 3-октябрда Лондондо өткөн VirusBulletin конференциясында «Касперский лабораториясынын» киберкоопсуздук боюнча адистери билдиришкенин Reuters агенттиги кабарлады.

Компаниянын эксперттери Өзбекстандын Улуттук коопсуздук кызматынын SandCat хакерлик тобу менен байланышы болгон деп эсептешет.

SandCat согуштук трояндар менен вирустарды иштеп чыгуу менен алектенип, алардын негизинде эксплойтторду (программаларды, программалык коддун фрагменттерин же системаны көзөмөлгө алууга багытталган командалардын ырааттуулугун) жазып, аларды жеке программалык камсыздоолорго интеграциялап келишкен.

Reuters агенттигинин маалыматына караганда, хакерлердин бир нече компьютеринде Касперский системасынын антивирусу орнотулган. Ал шектүү коддорду аныктап, аларды иштеп чыгуучуларга жөнөтүп турган. Өз кезегинде бул компания адистеринин кызыгуусун жаратып, жүргүзүлгөн изилдөөнүн жыйынтыгында зыяндуу код келип жаткан IP-дарек Ташкенттеги 02616 аскердик бөлүгүндө каттоодон өткөн itt.uz доменинде жайгашканы аныкталган.

Эксперттер ошондой эле иштеген жери катары аталган аскер бөлүгү көрсөтүлгөн О.Т. Хожакбаров аттуу адамга катталып, ачык реестрдеги доменден жасалган киберчабуулду байкашкан. Омониллахон Хожакбаров аттуу жаран өзбек президентинин жарлыгында дагы Улуттук коопсуздук кызматынын өкүлү катары көрсөтүлгөн. Ал 2005-жылы мамлекеттик сыйлык алган.

Иликтөөчүлөр чабуулдардын максаты тууралуу кеңири маалымат беришкен жок. Бирок алар SandCat «укук коргоочуларга, журналисттерге жана башка диссиденттерге» чабуул жасаганын белгилешти.

www.