632 Бардыгы /

5-октябрда Өзбекстандын Хорезм облусунда «Жамият» коомдук-саясий гезитинин кабарчысы Давлатназар Рузметов камакка алында. Бул тууралуу анын жубайы Ленинза Алиева билдирди.

– Күйөөм үйдөн чыккандан жарым саат өткөндөн кийин телефон чалып, аны укук коргоо органдары кармап кеткенин билдирди. Андан кийин аны менен байланыша албай калдым, — деди ал.

Алиева учурда жолдошунун кайсыл жерде экенин билбей жатканын кошумчалады.

— Күйөөмдүн телефону өчүк болуп жатат. Хорезм облустук ички иштер башкармалыгынан анын кайсыл жерде экенин билбей тургандыктарын айтышты. Райондук ички иштер бөлүмүнөн дагы ушундай эле жооп алдым, — деди Алиева.

Азырынча Рузметовдун эмне себептен кармалганы белгисиз. Облустук ички иштер башкармалыгынын басма сөз кызматынан бул боюнча суроолорго жооп берүүдөн баш тартышты.

Журналист 22-сентябрда кесиптеши Махмуд Ражабов тарабынан уюштурулган жөө жүрүштү «Фейсбуктагы» баракчасы аркылуу чагылдырган. Алар өлкөнүн ички иштер министри Пулат Бабажановго «Хорезм облусундагы мыйзамсыз иштер жөнүндө айтуу» үчүн Ташкентке жөө чыгышкан.

Кийинчерээк журналист Махмуд Ражаб менен ал иш-чараны чагылдырып жүргөн блогер Нафосат Оллашукурова 10 суткага камалган. Алар 3-октябрда эркиндикке чыгарылып, Оллашукурова дароо эле психоневрологиялык диспансерге жеткирилген.

Азырынча өлкөнүн Башкы прокуратурасы Рузметовдун камалышы жана Оллашукурованын психдиспансерге жаткырылганы боюнча билдирүү тарата элек.

Пахта терүү өнөктүгү маалындагы мажбурлап иштетүү тууралуу жазган макалалары менен белгилүү Давлатназар Рузметов былтыр октябрда «бейбаштык» беренеси менен жети суткага камалган. Анда ал профессионалдык ишмердүүлүгү үчүн жазаланганын билдирген.

www.