863 Бардыгы /

ЖЕНЕВА. Кыргыз Республикасынын Тышкы иштер министри Чыңгыз Айдарбеков башында турган Кыргыз  делегациясы Женева шаарында өткөн Качкындар иштери боюнча БУУнун Жогорку Комиссарынын Башкармалыгынын Аткаруу Комитетинин 70-сессиясынын алкагында жарансыздыкка каршы күрөшүү темасына арналган Жогорку деңгээлдеги сегментке катышты. Бул иш-чаранын башында  катышуучулардын астында Качкындар иштери боюнча БУУнун Жогорку Комиссары Филиппо Гранди чыгып сүйлөдү, ал Кыргызстан жарансыздык көйгөйүн толук чечкен дүйнөдөгү биринчи мамлекет деп атады.

Андан соң жарансыздыкка каршы күрөшүү ишинде Кыргызстандын жетишкендиктери жөнүндө Кыргыз РеспубликасынынТышкы иштер министри Чыңгыз Айдарбеков баяндама жасады. Анда Кыргыз министри качкындар, аргасыз жер которгондор жана жарансыз адамдар көйгөйүнө Кыргызстан өзгөчө көңүл бураарын жана бул багытта укук коргоо ыкмасы концепциясында негизделген системалуу жана үзгүлтүксүз иш жүргүзөөрүн кошумчалады. Анан дагы катышуучуларга Кыргызстан жарансыздыкты жок кылуу маселесинде уникалдуу ийгиликтерге жетишкендигин жана бүгүнкү күндө бул көйгөйдү чечкен дүйнөдөгү алгачкы өлкө болуп саналарын ачыктады.

Министр Чыңгыз Айдарбеков бул маселеде жарандык берүү, өзгөртүү жана жоготуу эрежелерин түзгөн мамлекеттер өздөрү негизги жоопкерчиликке ээ экендигин белгиледи. Жарансыздык шарттарда узак убакыттан бери  жашаган адамдардын укуктук макамын чечүү үчүн чоң күч-аракеттерди ишке ашыруунун маанилүүлүгүнө көңүл бурду. Анткени, бул көрүнүш адамдын укуктарынын негизги принциптерине каршы келет. Кыргызстандын тышкы саясий ведомствосунун  башчысы Кыргызстан бул багыт боюнча мындан ары да жигердүү жана ырааттуу ишти алып бараарына бекем ишендирди.

Кыргыз Өкмөтүнүн мүчөсү Чыңгыз Айдарбеков 2014-жылы иштеп баштаган УВКБ#IBelong кампаниясынын алкагында, Кыргызстан 13700 жарандыгы жок адамды тапкандыгына, анын ичинде 2000 жаш балдар экендигине көкүл бурду. 2014-2024-жылдарга Кыргызстан БУУ Качкындар иштери боюнча Башкармалыгынын Жогорку Комиссарынын колдоосу менен, ошондой эле өкмөттүк эмес сектордун жана жергиликтүү өз алдынча башкаруу органдарынын катышуусунда өлкөдөгү жарандыгы жок адамдарды табуу жана документтештирүү жана Кыргызстанда документтештирилбеген адамдарды табуу боюнча пилоттук долбоорлорду жүзөгө ашырган. Жүргүзүлгөн иштин натыйжасында беш жыл аралыгында эле Кыргызстанда жарандыгы жок адамдардын саны 13 миңден  нөлгө түштү.

Алишер ТОКСОНБАЕВ ,өз кабарчы