2,748 Бардыгы /

Бүгүн, 17-октябрь күнү Жалал-Абад мамлекеттик университетинде “Санариптештирүү: дүйнөдө жана бизде” аттуу санариптештирүү процессииндеги дүйнөдөгу жана өлкөбүздөгү жетишкендиктер жана мүмкүнчүлүктөрү тууралуу конференция болуп өттү.

Аталган конференцияга экс-президент Роза Отунбаева катышып, санаритештирүү жана ааламдашуу процесстери күн санап өсүп жатканын, ал эми биздин өлкө дагы толугу менен санариптешүүгө өтүүсү керектигин баса белгиледи.

“Эл азыр санариптештирүү процессине кире албай жатат. 139 мамлекеттин ичинен Кыргызстан 97 орунда турат. Бул эмне дегендик? Биз болгону жерде эле олтурат экенбиз, башка өлкөлөр болсо алдыга кетип калышты. Демек, ар бир бала, ар бир адам заманбап техникаларды колдоно билүүсү керек. Ал үчүн жогорку окуу жайлар студенттерге жаңы билим берүүгө аракет кылышы керек. Биз болгону Жалал-Абадга келгенибиз менен алыскы райондорго барбадык да, ошону үчүн окуу жайлар райондорго, элге ушундай билимдерди жайылтуусу зарыл”-дейт Р. Отунбаева.

“Конференцияда адистер дүйнөдө кандай жаңы технологиялар чыгууда жана Кыргызстанда кандай өнүгүү болгондорун айтып жатышат. Биз болсо жогорку технологиялар паркы жөнүндө маалымат берип, азыркыга чейин жеткен жетишкендиктерибиз тууралуу айтып өттүк. Учурда жаштарды кайсыл багытка бурушубуз керек? айти тармагынын келечекте орду чоң. Андыктан жаштарга ушул багыттагы маалыматтарды жеткиришибиз керек”-дейт К.Акматов, Жогорку технологиялар паркынын жетекчиси.

Конференциянын максаты –КРдин Президентинин “Санариптештирүү жана аймактарды өнүктүрүү” жылына карата областтардын, райондордун активдерине, мамлекеттик мекемелердин жетекчилерине, айыл аймактарынын башчыларына дүйнөдөгү жана өлкөбүздөгү санариптик ачылыштар, технологиялар менен тааныштыруу артыкчылыктуу багыттарды аныктоого мүмкүнчүлүк түзүү болуп саналат.

Акылай КАРАБАЕВА, “Аймак”