1,923 Бардыгы /

ЖАЛАЛ-АБАД. Бүгүн, 18-октябрь күнү калаа мэриясында өткөн кезектеги коллегиялык жыйында  Жалал-Абад шаарынын 2019-жылдын 9 айындагы социалдык-экономикалык, жергиликтүү өнөр жай жана курулуш тармактарында аткарылган жумуштардын жыйынтыгы чыгарылды.

Коллегияны шаардын биринчи вице-мэри Майрамбек Адылбеков жетектеп, калаанын бир катар тармактарында өсүү бар экенин айтты. Бирок ошол эле учурда орун алып жаткан кемчиликтерди да баса  белгиледи. Алсак, шаарда өткөн жылга салыштырмалуу төрөт мезгилинде эне жана балдардын өлүмүнүн өскөнү, ар түрдүү жугуштуу оорулардын көбөйүүсү жана  бул жылга белгиленген айрым курулуштардын мөөнөтүнүн кечеңдөөсү сыяктуу маселелер көтөрүлдү. Бул багытта тийиштүү тармактардын жетекчилери тарабынан кетирилген кемчиликтердин келип чыгуу себептери айтылды.  

Жалал-Абад шаары үчүн приоритеттүү тармак бул өнөр жай болуп эсептелет. 2019-жылдын январь-сентябрь айында шаар боюнча өндүрүлгөн өнөр жай продукцияларынын  физикалык көлөмүнүн индекси 103,9 пайыз, ал эми өсүү темпи 96,3 пайызды түздү. Өткөн жылдын ушул мезгилине салыштырмалуу 23 өнөр жай ишканалары  тарабынан 156,3 миллион сомдук продукция көп өндүрүлгөн. Аны менен катар шаардын көрсөткүчүн артка тарткан өндүрүштүк мекемелердин да аты аталды. Мамлекеттик салык кызматынын Жалал-Абад шаары боюнча башкармалыгына 9 ай ичинде салык жана салык эмес төлөмдөр боюнча жеткирилген план-тапшырма 584,7 миллион сом болсо, анын аткарылышы 596,2 миллион сомду түзгөн. Бул көрсөткүч 2018-жылдын улуш мезгилине салыштырмалуу 49 миллион сомго көп жыйналып, өсүү ыргагы 119,3 пайызды түздү.

Коллегиялык жыйында 2019-жылга пландалып, курулуш тармагында аткарылган жумуштар боюнча маалыматтар берилди. Аны менен катар билим берүү тармагынын ишмердүүлүгү, андагы маселелер, калаанын кышка карата даярдыгы, жашылдандыруу жана көрктөндүрүү чарбасы тарабынан аткарылган жумуштар айтылды.

Жыйындын соңунда бир катар тармактарда кетирилген кемчиликтер эске алынып, тийиштүү жетекчилерге эскертүүлөр берилип, айрымдарына сөгүш жарыяланды. Ага улай жыл жыйынтыгы чыкканга чейин орун алган маселелерди жоюу милдеттендирилди.