844 Бардыгы /

Жалал-Абад шаардык кеңешинде күн тартибиндеги маселе талкууланып жатканда депутаттар сыртка чыгып кетишти, төрага аргасыздан танапис жарыялоого мажбур болду.

29-октябрь күнү Жалал-Абад шаардык кеңешинин кезектеги сессиясы болду. Жалпы 31 депутаттын 25 и катышты. Күн тартибинде коюлган экинчи маселеде айрым депутаттар сыртка чыгып кеткендиктен 19 адам добуш берүүгө катышты. Ал эми үчүнчү, тактап айтканда Тайгарев аймактык башкармалыгындагы калкты ичүүчү таза суу менен камсыз кылуучу скважиналардын ижара акысын бекитүү маселесин талкуулап жатканда төрага Айбек Джолдошев депутаттардан сыртка чыгып кетпөөсүн, антпесе кворум жетпей каларын айтты. Айтылган сөзгө карабай 2 депутат удаа эшикти көздөй жөнөштү. Аталган аймактагы таза суу  көйгөйүн ар дайым көтөрүп келген депутат Талант Баев  маанилүү маселеде кворм жок болуп каларын айтып, добушка койбой туруп танапис жарыяланышын суранды.

Эске сала кетсек, былтыркы жылы ушул чакырылыштын депутаттары Жалал-Абад шаардык кеңешинин депутаттарынын сессия учурундагы этикалык кодексин иштеп чыгышкан. Этикалык кодекстин токтому талкууга коюлганда, айрымдар бир айда бир болгон сессияга келбей койгондор жана сессия учурунда телефон чукулап, сыртка чыгып кетип жаткан жагдайлардын айынан ушундай кадамга барып жатышканын айтышкан болчу.

Роза Акматжан кызы “Аймак”