2,780 Бардыгы /

Чаткал райондук социалдык фонд башкармалыгында быйыл бир топ жаңылануулар орун алды. Тактап айтканда, мекеменин ичи заманбап өзгөртүлүп, кызматкерлер калкты “Бирдиктүү терезе” аркылуу тейлеп башташты.

Кызматкерлер учурда мурдагыдай ар бөлмөдө иш жүргүзбөй,  заманбап түрдө айнектен жана пластик тосмолордон курулган ачык бөлмөчөлөрдө калкты тейлешүүдө. Бул бир жагынан калк үчүн ыңгайлуулук болсо, экинчи жагынан быйылкы “Аймактарды өнүктүрүү жана өлкөнү санариптештирүү жылына” карата аткарылган негизги жумуштардын бири болду.

Мындан сырткары,  мекеменин ички жылуулук тутуму жаңыланып, кызматкерлердин ыңгайлуу иштеши үчүн  имараттын бардык бөлмөлөрүнө талаптагыдай жылуулук берилди.

Ал эми, башкармалыктын архиви имараттан сыртка чыгарылып, атайы контейнерге жайгаштырылган бөлмөгө киргизилди. Бул жерге мекеменин күзөтчүлөрү турчу бөлмө да жайгаштырылды.

-Жакынкы мезгилде мекеменин имаратынын эшигин келгендерге ыңгайлуу болушу үчүн көчө тараптан ачабыз. Буга кошо эле, мекемеге видеокөзөмөл камераларын орнотобуз. Бул иштерге каржылоо каралган. -дейт социалдык фонд башкармалыгынын башчысы Нармырза Жолдошов.

Анын билдиришинче, аталган жумуштар КР. Социалдык фондунун каржылык жардамы аркасында ишке ашты.

Бүгүн район акими Канжарбек Эшалиев баштаган райондук мекеме-ишканалардын жетекчилер тобу райондук социалдык фонд  башкармалыгында болушуп, мекеменин жаңыланган ички шарттары менен жакындан таанышышты.

Эскерте кетсек, Нармырза Жолдошов жарым жылдай мурда Чаткал райондук социалдык фонд башкармалыгынын башчысы болуп дайындалган.  Буга чейин Ала-Бука райондук социалдык фонд башкармалыгынын башчысы болуп иштеп келген.

Мухамедалы ЭШНАЗАРОВ, Чаткал району