1,216 Бардыгы /

Киев соту «Казакстандын демократиялык тандоосу» кыймылынын лидери Мухтар Аблязовдун тарапташы, блогер Жанара Ахметтин доо арызын карайт. Буга чейин Украинанын миграция кызматы блогер менен анын баласына качкын макамын берүүдөн баш тарткан.

Жанара Ахмет 2017-жылы мартта тогуз жаштагы уулу менен Казакстандан чыгып кеткен. Ал мекенинде куугунтукталып жатканын айтып, Украинадан башпаанек сураган.

Блогерди Казакстанга экстрадициялоо боюнча жараян 2017-жылы октябрда башталган. Ал анын алдында бир катар кылмыш жасоо шеги менен эл аралык издөөгө алынып, Киевде кармалган. Ноябрда Киев соту аны Украина Жогорку Радасынын депутаты Светлана Залещуктун кепилдиги менен бошоткон. Ошондон бери блогер башпаанек алуу түйшүгүн тартып келет.

Жанара Ахмет Казакстандан качып кеткенге чейин түрмөдөн чыгып, пробациалдык көзөмөлдө болгон. Ал 2009-жылы алдамчылык айыбы менен соттолгон. Ахмед бул иш атайлап жасалганын билдирген. Украинада ал казак бийлигин сындап, казакстандык активисттерди колдогон митингдерге катышкан.

Жанара Ахметти «16/12» маалымат каналынын башкы редактору жана «Казакстандын демократиялык тандоосу» кыймылынын лидерлеринин бири катары атап жүрүшөт. Казак бийлиги бул кыймылды экстремисттик уюмдардын катарына кошкон.

www.