1,308 Бардыгы /

Прездентибиз үстүбүздөгү жылды региондорду өнүктүрүү жана санариптештирүү, балдарды колдоо жылы катары жарыялашы айыл элин соцтармактагы көйгөйлөрдүн чечилишинен үмүткөр кылып койду. Анткени айыл жерлеринде чечилүүнүн талап кылган көйгөйлөр көп. Алардын бири мектеп. Авлетим айыл аймагына караштуу Дейрес айылы чек арага чектеш жайгашкан айыл, аталган айылдарда көйгөй аз эмес, таза суу, сугат суусу, мектеп, жол дагы толгон токой муктажыктарды айта берсе арбын. Айылдагы Нүсүп бий атындагы орто мектептин имараты союз мезгилинде мал кыштатуучу штабдын кеңсеси болгон. Бул тууралуу мындагылар айтышты. Дейрес айылында 236 кожолукта 1223 калк жашайт, мектепте болсо 243 окуучу эки смена менен окуйт. Мектептин класс кабинеттери талапка жооп бербейт. Мектепте актовый зал, спорт зал деген кабинеттер жок. Дубалдары жарылып, көчүп түшүп калуу коркунучуна кептелип калды. Эгер жер титирөө болсо, мектеп балдарды басып калбайт деп эч ким кепилдик бере албайт. Мектептин дубалдары жарылып, полдору чирий баштаган. Класстар тар болгондуктан талаптагыдай билим берүүгө шарт жок. Спорттук аянтчасы да жок. Жаңы мектеп курууга мында жер бөлүнүп коюлганына 20 жылдан ашты. Окуучулар ичинде 6 чакырым жерден келип окугандары да бар. Биз деле заманбап мектепте окугубуз келет дейт окуучулар.

Быйылкы жылда балдарды колдоо жылы болсо, анда чек арада жайгашкан Дейрес айылындагы бул мектептин тагдырын чечип, балдардын үмүт тилегин ишке ашыруу башкы иштердин бири болуш керек эле. Бирок азырынча мектепти жаңы куруу боюнча сөз жок.

Абдымомун КАЛБАЕВ, Аксы району.