887 Бардыгы /

Учурда Швецияда жашап жаткан шинжаңдык казак Сайрагүл Сауытбай АКШ Мамлекеттик департаментинин «Каарман аял» сыйлыгын алды. Сыйлыкты тапшыруу аземи 4-мартта Вашингтондо өтүп, ага мамлекеттик катчы Майк Помпео менен президенттин жубайы Мелания Трамп катышты.

Мамдепартаменттин билдирүүсүндө Сауытбайдын көрсөтмөлөрү – Кытайдын репрессивдүү саясатын эл аралык коомчулукка ашкере кылган алгачкы далилдердин бири экени белгиленген.

44 жаштагы Сауытбай 2018-жылдын апрель айында «казак-кытай чек арасынан мыйзамсыз өттү» деген негизде Казакстанда кармалган. Ал соттук териштирүүдө Шинжаң аймагында саясий лагерлерде иштегенин, ал жакта миңдеген уйгурлар, казактар жана кыргыздар кармалып турганын, кайра Кытайга барса өлүм жазасына тартыларын айткан. Казак соту аны алты айга шарттуу кескен. Он айдан кийин Сауытбай Казакстандан Швецияга чыгып кеткен.

Быйыл Сауытбайдан тышкары бул сыйлыкты дагы 11 аял алды. Алардын арасында ооганстандык журналист Зарифа Гафари, пакистандык укук коргоочу Жалила Хайдер жана армениялык журналист Люси Кочарян да бар.

www.