1,020 Бардыгы /

Кордайда казактар менен дунгандардын ортосунда улут аралык жаңжал чыккан күнү дайынсыз жоголгон Мурат Масановдун көз жумганы белгилүү болду.

Маркумдун туугандарынын айтымында, кагылышуудан бир-эки күн өткөндөн кийин Масанчи айылындагы имараттын урандысынын алдынан табылган күйүп калган сөөк Масановдуку экени аныкталды.

Мурат Масановдун тууганы Бактияр Абдишевдин айтымында, азыр маркумдун сөөгүн жерге берүүгө даярдык көрүлүүдө.

– Буга чейин атасынан кан алынган. Экспертизанын кортундусу чыкты, “бизге атасы менен баласынын каны шайкеш келди” деп айтышты. Документтер бар, бирок мен өзүм көрө элекмин. Ишенгим келген жок, бирок ушундай болуп калды, – деди ал.

Бул маселе боюнча Жамбыл облустук полиция департаменти маалымат берген жок.

20 жаштагы Мурат Масанов 7-февралда жаңжал башталган күнү үйүнөн чыгып кетип, кайта кайрылган эмес. Маалыматка караганда, жигиттин өрттөлгөн автоунаасы 8-февралда Масанчи айылынын жанынан табылган.

9-февралда Мурат Масановдун туугандары прокуратурага жана полицияга арыз менен кайрылышкан.

7-8-февралда Масанчи, Аукатты, Сортөбө, Булан-Батыр айылдарында болгон окуя 11 адамдын өлүмү менен аяктаган. Дагы ондогон киши жаракат алган.

Расмий маалыматка ылайык, 30дай турак жай, 17 соода имараты жана 50дөй машине өрттөлүп, талкаланган. Кагылышка байланыштуу 23 миңден ашуун адам Кыргызстанга убактылуу качып келгенге аргасыз болгон.

Башкы прокуратура окуяга байланыштуу 25 кылмыш иши козголгонун билдирген, бирок канча адам кармалганы, канчасына айып коюлганы тууралуу маалымат бере элек.

Казакстандын президенти Касым-Жомарт Токаев улут аралык чатакка байланыштуу Жамбылдын губернатору, Кордойдун акими жана облустук, райондук полиция жетекчилери баштаган бир топ аткаминерди кызматтан алган.

www.