1,388 Бардыгы /

Жалал-Абадда “Баяна-стиль” тигүү цехинде марлиден беткаптар тигилип, учурда 1500 даанасы даяр.  Ал эми шаар мэри беткаптардын кандай шарттарды тигилүүсү менен таанышып кайтты.

Марлиден тигилген беткаптардын баасы 16 сомдон жогору болору болжолдонууда.

“Баяна-стиль” ишканасынын менеджери  Эргеш Султановдун айтымында күнүнө миң даана беткаптар тигилип, дагы да көбүрөөк беткап чыгарууну максаттоодо.

“Шаардык мэриянын сунушу менен учурдагы кырдаалдарды эске алып, 16-марттан тарта  марлиден медициналык беткаптарды тигип баштадык. Учурда бир күндө миң даана беткап даярдалууда, алдыда андан көп тиге баштайбыз. Ал эми сырьену Өзбекстандан алып келүүдөбүз, бизде бир жумага жете турган сырье бар” – дейт Э. Султанов

Шаар мэри Мураталы Тагаев  калктын   беткаптар менен камсыз болорун жана алардын саламаттыгы үчүн аракеттер көрүлөрүн айтып, төмөкүлөрдү кошумчалады.

“Бүгүнкү күндө бул цехте беткаптарды тиге башташты. Буга чейин шаар аймагында медициналык беткаптардын таңкысыгы болгон. Анын негизинде ишкер менен сүйлөшүп, шаар калкына беткап тигип берүү боюнча сунушту бергенбиз. Ош, Бишкектеги беткап тигип жаткан цехтерден үлгүлөрүн алып келип, стандартка ылайык жасашууда”,-дейт М.Тагаев

Ал эми тигилип жактан беткаптардын негизи стандартка туура келерин жана жаш балдарга да тигүү керектигин санэпидемологиялык станциянын башкы даргеринин орун басары Тыныбек Жоробаев мындай билдирди.

“Учурда тигилип жаткан беткаптар стандартка жооп берет. Бир жолу колдонуучу беткаптарга караганда марлиден тигилген беткаптар жакшы. Анткени аны 4-6 катмарлуу тигүүгө болот жана жууп иштетүүгө мүмкүн. Цехтин жетекчилигине жаш балдарга ылайыктап өзүнчө беткап тигүү боюнча сунуштадык. Анткени чоңдор менен балдардын беткабында айырма болушу керек”,-дейт Т. Жоробаев

Ал эми “Баяна-стиль” тигүү цехинде 10 жумушчу иштеп келет.

Акылай КАРАБАЕВА, “Аймак”