– Асет коронавируска байланыштуу коопсуздук чараларын күчөтүүнү, соттолгондорду беткап менен камсыздоону, дезинфекция жасоону талап кылганы үчүн карцерге камалды. Ушул тапта колонияда карантин жарыяланган, жолугушууга уруксат жок. Колония башчысы менен сүйлөшө алган жокмун. Азырынча Абишевди канча суткага отургузушканын дагы билбейм, – деди Жуаспаева.

Алматы облусунун атайын прокурорунун орун басары Ербол Керимбек Абишевдин айып изоляторуна киргизилгенин тастыктады. Ал Абишев жанында мобилдик телефон алып жүргөнү үчүн карцерге которулганын белгилеп, коронавируска байланыштуу колонияда коопсуздук чаралары көрүлүп жатканын айтты.

42 жаштагы Асет Абишев 2018-жылы “Тыюу салынган уюмдун ишине катышуу” айыбы менен төрт жылга соттолгон. Активисттин тарапташтары ал чет өлкөдө жашаган мурдагы банкир, казак бийлигин сындап жүргөн Мухтар Аблязовдун “Казакстандын демократиялык тандоосу” кыймылын колдогону үчүн куугунтукталууда деп эсептешет. Казакстанда кыймыл экстремисттик уюм катары табылган.