Европа өлкөлөрү, Орусия, Кытай, Бириккен Улуттар Уюму (БУУ) каатчылык маалында дээрлик 500 миллион долларлык каржылоону токтотуу туура эмес чечим экенин билдиришти.

«Башкаларды айыптоо эч кандай пайда алып келбейт… Азыр пандемияга каршы күрөшүүдөгү эң мыкты салым — бул каржылоосу ансыз деле жетишсиз болуп жаткан БУУну, анын ичинде ДССУну бекемдөө, тесттерди таратуу жана вакцина иштеп чыгуу болуп эсептелет», — деп жазды Германиянын тышкы иштер министри Хайко Маас «Твиттердеги» баракчасына.

Апта башында АКШ лидери ДССУ коронавируска каршы күрөшүүдө өзүнүн негизги милдеттерин аткара алган жок деп айыптаган. Ошондой эле Трамп администрациясына бул уюмду каржылоону убактылуу токтотуу тапшырмасын бергенин, 2-3 айдын ичинде уюмдун иши боюнча иликтөө жүргүзүлөрүн билдирген.

Өткөн жылы АКШ ДССУну каржылоого 400 миллион доллардан ашык каражат бөлгөн. Бул уюмдун бюджетинин 15% түзгөн.