962 Бардыгы /

АКШнын Миссури штатынын башкы прокурору Кытайга каршы америкалык сотко доо арыз жазды. Эрик Шмитт Бээжинди жаңы коронавирус тууралуу маалыматтарды жашырууга айыптап, мындан улам штаттын жашоочулары зыянга учураганын билдирүүдө.

Доо арызда алгачкы баскычтарында пандемияны токтотууга мүмкүн болгондугу, анын дүйнөгө жайылганына Кытай жооптуу экени жазылган. Шмитт кытай бийлиги өлкөнү эртерээк жабышы керек болчу деп эсептейт. Ал Бээжинди вирус адамдан адамга жугарын эскерткиси келгендердин оозун жабууга да айыптады.

Доо арызда коронавирустан улам Миссуриде жумушсуздук көбөйүп, пандемия штатка экономикалык да зыян алып келгени белгиленген.

АКШда Кытайга каршы мындан башка дагы бир нече жеке доо арыз жазылган. ABC телеканалы Нью-Йорктун үч жашоочусу Дүйнөлүк саламаттык сактоо уюмуна (ДССУ) каршы сотко кайрылганын кабарлаган. Алар уюмду пандемия тууралуу маалымат берүүдө Бээжин менен кутумга барган деп айыпташууда.

Буга чейин АКШнын президенти Дональд Трамп ДССУну коронавируска каршы күрөшүүдө өзүнүн негизги милдеттерин аткара алган жок деп айыптап, уюмду каржылоону убактылуу токтото турганын билдирген. Трамптын пикиринде, ДССУ Кытайга ашыкча ишенип, пандемиянын өөрчүшүн токтотуу мүмкүнчүлүгүн колдон чыгарып жиберген. Мындан тышкары АКШнын президенти Кытай коронавирус илдетинин жайылышы пандемия деңгээлине жеткенине атайлап жол бергени аныкталса Бээжин анын кесепетин тартаарын эскерткен. Ал ошондой эле COVID-19 вирусунан каза болгондордун саны боюнча Кытайдын расмий статистикасына ишенбей турганын кошумчалаган.

Өз кезегинде ДССУ бул айыптоолорду четке каккан. Кытайдын Тышкы иштер министрлигинин өкүлү Чжао Лицзянь вирус атайын жасалганы тууралуу кабарларды төгүндөп, айыптоо эч кандай далил менен коштолбогонун маалымдаган.

WWW.