1,465 Бардыгы /

ЖАЛАЛ-АБАД. Быйылкы жылдын 9-апрель күнү JIA Бизнес -ассоциациясы “Курулуш тармагындагы көйгөйлөр” аталышындагы онлайн-конференция уюштурду. Бул видеоконференциянын негизги максаты Кыргызстандын курулуш тармагындагы актуалдуу көйгөйлөрдү, курулуш тармагына COVID-19 коронавирус пандемиясынын терс таасирин, анын ичинде этаптуу долбоорлоо  жана курууга уруксат берүүчү мыйзамдарга киргизилген өзгөртүүлөрдү, ошондой эле өрт коопсуздугунун маселелерин талкуулоо болду.

Видеоконференцияга курулуш тармагындагы 30дан ашык ишкерлер катышты жана басымдуу бөлүгү региондордогу JIA мүчөлөрү түздү.

Ишкерлердин пикири боюнча COVID-19 коронавирус пандемиясынын курулуш тармагына тийгизген терс таасири чоң. Мындай учурда Кыргыз Республикасынын Жогорку Кеңешинин депутаттары тарабынан каралып жаткан этаптуу долборлоо жана өрт коопсуздугу боюнча демилгеленген мыйзам долбоорлору бүтүндөй тармакка оң таасирин тийгизип, экономикалык кризистен чыгууга жардам берерин белгилешти.

Андан сырткары курулуш жүргүзүүдө учурдагы абалдан сырткары да бир топ көйгөйлөр бар. Буга чейин чечилбей келген маселелерди чечүү учурдун талабы экени айтылды. Анткени курулуш тармагы эң көп жумуш өрундарын түзгөн тармак жана анын артынан бир топ башка бизнестер да өз ишин жандантып кетет. Алсак, Жалал-Абад шаарындагы курулуш компаниялары уруксат кагаздарын алууда кыйналып жатышканын белгилешти.  Бул жерде уруксатты алууда Кыргыз Республикасынын Транспорт жана жолдор министрлигинин алдындагы Жарандык авиация агенттиги маанилүү ролду ойнойт. Бул уруксатты алуу кыйын, анткени Жалал-Абад аэропорту өзүнүн айланасындагы санитардык зона эки чакырымга кеңейтилген. Бул шаардын 70% аянтын камтыйт.

Дагы бир көйгөйдү Талас облусундагы ишкер билдирди. Анын айтымында курулуш компанияларына мамлекеттик мекемелерде аткарылган иштер үчүн подрядчыларга төлөмдөрдүн тездетиши боюнча түшүндүрмөлөр берилген эмес.

Мындан тышкары видеоконференциянын катышуучулары курулуш тармагынын абалын жакшыртуу боюнча бир нече сунуштарын айтышты. Анда курулуш компаниялардын кредиттик милдеттенмелери боюнча тыныгуу киргизүү, мамлекеттик объекттерде аткарылган жумуштар үчүн подрядчыларга төлөмдөрдү тездетүү, тармакты колдоо үчүн финансылык жана фискалдык чараларды киргизүү, ошондой эле уруксат алуу жол-жоболорун жөнөкөйлөтүү сунушталды.

Бул видеоконференция USAIDдин «Конкуренттүү ишкана» долбоорунун техникалык колдоосу менен “Этаптуу курулуш жана өрт коопсуздугу боюнча Кыргыз Республикасынын мыйзам долбооруна өзгөртүү киргизүү” алкагында өткөрүлдү.

«Аймак»