993 Бардыгы /

Казакстандык активисттер бийликти «Турмуштук зомбулук тууралуу» мыйзамдагы «мурдагы күйөөсү» жана «жарандык никедеги адам» деген түшүнүктөрдү алып салууга чакырышууда.

«НеМолчиKZ» аттуу фонддун кайрылуусунда турмуштук зомбулуктун алдын алуу үчүн эскертүү берүү натыйжасыз экени белгиленген. Алардын айтымында, полиция зомбулук көрсөткөн адам жабырлануучунун ден соолугуна орто же оор зыян келтиргенде гана кылмыш жоопкерчилигине тартып, башка учурларда эскертүү берүү менен гана чектелүүгө аргасыз болууда.

Бүгүнкү күндө өлкө парламентинин кароосундагы «Үй-бүлөлүк жана турмуштук зомбулукка каршы аракет тууралуу» мыйзам долбоорунда «мурдагы күйөөсү» жана «жарандык никедеги адам» түшүнүктөрү жабырлануучунун «үй-бүлө мүчөсү» катары көрсөтүлгөн. Активисттердин маалыматына караганда, үй-бүлөлүк зомбулукка байланыштуу полицияга кайрылган аялдардын 70 пайызы мурдагы күйөөлөрүнүн аракеттерине даттанышат.

28-апрелде Нур-Султан шаарынын 38 жаштагы тургуну үйүнүн кире беришинде бычакталып, ооруканада каза болгон. Күн мурун ал мурдагы күйөөсү сабап жатканын айтып, полицияга кайрылган. Укук коргоо кызматкерлери зомбулук көрсөткөн адамды кармап, «профилактикалык сүйлөшүүдөн» кийин эскертүү берип кое беришкен. Жабырлануучунун өлүмүнөн кийин ал бул кылмышка шектүү катары кайра кармалды.

2017-жылы Казакстанда турмуштук зомбулук криминалдык аракеттердин катарынан чыгарылып, кылмыш деп эсептелинбей калган. Өлкөнүн ошол кездеги президенти Нурсултан Назарбаев «уруп-согуу» жана «денеге атайылап жеңил зыян келтирүү» беренелерин Кылмыш кодексинен Административдик кодекске которуу тууралуу мыйзамга кол койгон.

WWW.