2,642 Бардыгы /

ЖАЛАЛ-АБАД. Урматтуу калайык калк өзүңүздөр көрүп жана билип тургандай дээрлик Бүткүл дүйнөнү каптап келе жаткан “Коронавирус” оорусунун биздин жергебизге тараганы айрыкча  медицина кызматкерлерин түйшүккө салууда.

Ар бир катталган учурду өз убагында иликтеп, контакта болгондордун тизмесин тактап, аларды 14 күндүк медициналык байкоого алып, лаборатория жактан изилдөө жүргүзүп, ал эми бейтаптарды дарылап чыгаруу канчалаган эмгекти талап кыларын өзүңүздөр көрүп турасыздар.Эгерде кимдир бирөө өзүнүн бейтап менен контакта болгондугун билип турса дагы, кайрылбай калган учурлар дагы кездешүүдө. Ооруну жашырсаң өлүм ашкере кылат деген макалды унутпаш керек. Ошондой эле үй-бүлөдө кимдир бирөөдө кичине эле оорунун белгилери байкалса, (ысытмасы көтөрүлүп, жөтөлгөн) үйүңүздөргө үй-бүлөлүк дарыгерлерди же болбосо тез жардам машинесин чакырыңыз. Алар жардамга келгенге чейин калган үй-бүлө мүчөлөрүн бейтапка жакындатпоого аракет кылыңыз.  Азыркы учурда көчөлөргө айрыкча базарларга жана соода түйүндөрүнө чыккан адамдардын саны күн сайын көбөйүүдө. Алар беткаптарды кийбеген же болбосо беткапты жаагына түшүрүп мода сыяктуу тагып алгандарды учуратуудабыз. Бул көрүнүш өзү үчүн дагы айланадагы адамдар үчүн дагы кооптуу экендигин байкашпайт. Мындан тышкары соода катарларында жана соода түйүндөрүндө кол жуугучтар жетишсиз же болбосо жокко эсе. Ошондуктан ар бириңер өзүңөр менен кошо антисептиктерди алып жүрүшүңөр талапка ылайык.

Ар бир адамдын ден соолугу өзүнүн колунда деп бекеринен айтылбайт. Сиздерди коронавирус оорусунан сактап калуу максатында канчалаган медицина кызматкерлери, областтык жана район шаардык ички иштер бөлүмдөрүнүн кызматкерлери, аскер жана жарандык коргонуу бөлүмдөрүнүн кызматкерлери жана жергиликтүү бийликтин кызматкерлери күн- түн дебей тер төгүшүүдө. Жок дегенде жогорудагы Сиздер үчүн өздөрүнүн өмүрүн тобокелге салып иштеп жаткан кызматкерлердин мээнетин сыйлагыла.Эгерде Сиз режимди сактасаңыз медицина кызматкерлерине жардам берип, эл-журтту сактаган болосуз.

Улпат НАЗИРБЕКОВА, Жалал-Абад шаардык ОАА ж МСЭКБдин бөлүм башчысы