967 Бардыгы /

Израилдин Жогорку Соту шаршемби күнү кечинде азыркы премьер-министр Биньямин Нетаньяху коррупциялык иштерге айыпталганына карабай, өлкөнүн жаңы өкмөтүн башкара ала турганы жөнүндө чечим кабыл алды.

Чечим бир добуштан кабыл алынды. Сот Нетаньяхуну өкмөт куроодон четтетүүнү талап кылган петицияны четке какты.

20-апрелде Нетаньяху жана анын атаандашы Бенни Ганц коалициялык өкмөттү куруу үчүн мунасага келишкен. Ага ылайык, эки саясатчы өкмөттү кезектешип жетектейт.

10 жылдан ашуун бийликте турган, учурда убактылуу өкмөттү жетектеген Нетаньяху жаңы министрлер кабинетин 18 ай башкарат. Андан кийин бул милдетти армиянын мурдагы жетекчиси Ганц аркалайт.

Бирок бир катар топтор, анын ичинде опопзициялык партиялар, өлкөдөгү демократияга көз салгандар Израилдин Жогорку сотуна кайрылышкан. Алар жогорудагы макулдашууну жокко чыгарып, Нетаньяхуга кылмыш иши козголгонун эске алып, ага жаңы өкмөт куруу укугун бербөөгө үндөгөн.

Сот Нетаньяхуну колдобогон чечим чыгарса, анда 2019-жылдын апрелинен берки төртүнчү шайлоого жол ачылмак.

WWW.