1,653 Бардыгы /

Казакстандын Акмоло облусуна караштуу Целиноград районунун Косшы айлында тез жардам медициналык станциясынын фельдшерлери жана айдоочуулары 6-майда ишке чыгуудан баш тартышты.

Отуздан ашуун кызматкер мамлекеттен коронавирус эпидемиясы учурунда барына бирдей компенсация төлөп берүүнү талап кылышууда.

Айдоочу Досбол Далабеков мартта айлыктан тышкары 11 миң теңге (26 доллар) алганын билдирди:

– Бул эмне деген акча? Эгер коронавирус үчүн болсо, бербей эле коюшса болмок, – деди ал.

Медиктер вирус жуктурган бейтаптар менен түзмө-түз иштешпесе да, аларды караган дарыгерлер менен байланышта экенин, кооптуу шартта иштеп жатышканын жүйө келтиришүүдө.

Нааразы болгон кызматкерлер менен Акмоло обустук тез жардам станциясынын башчысы Александр Высоцкий жолугуп, эгер айлыкка канааттанбай жатышса, кошумча иш издөөнү сунуштады.

Тараптар бир пикирге келген жок. Медициналык кызматкерлер иштей беришерин, бирок бул маселе чечилбесе, команда толук жумуштан кетүүгө аргасыз болорун айтышты.

30-мартта Казакстан бийлиги коронавируска каршы күрөшүүгө катышып жаткан медицина кызматкерлерине 212 миңден 850 миң теңгеге чейин кошумча акы төлөнөрүн билдирген.

WWW.