1,153 Бардыгы /

11-май күнү эртең менен Алматы шаарынын кире беришинде калаага киргиси келген облус тургундарынын узун кезеги жаралды. Бул күнү коронавирус пандемиясына байланыштуу киргизилген өлкөдөгү өзгөчө абал режиминин мөөнөтү аяктаган.

«Азаттык» радиосунун казак кызматы кабарлагандай, шаардын кире беришиндеги блокпосттордо жарандардын шаардык каттоосу бар-жоктугу текшерилүүдө. Буга байланыштуу автоунаалардын бир нече чакырымга созулган кезеги жаралган.

Социалдык түйүндөргө жарыяланган видео тасмаларда калаанын кире беришиндеги темир тосмонун алдында жүздөгөн киши жана куралчан полиция кызматкерлери турганын көрүүгө болот. Видеонун автору Алматынын жака-белинде жашап, шаарда иштеген тургундардын көбү калаага киргизилбей жатканын айткан.

Күн мурун Алматынын башкы санитардык дарыгери Жандарбек Бекшин калаа эпидемиянын туу чокусунан өткөнүн билдирген. Ошол эле маалда ал шаарда өзгөчө абал режими алынгандан кийин карантин режими кала берерин белгилеген.

«Шаардын кире бериштериндеги блокпосттор иштей берет, кирип-чыгууда мурдагы эрежелер сакталат», — деген Бекшин.

Казакстанда коронавирус пандемиясына байланыштуу киргизилген өзгөчө абал режиминин мөөнөтү расмий түрдө 11-майга караган түнү аяктады. Буга чейин бийлик анын мөөнөтүн эки жолу узарткан. 19-мартта карантинге жабылган ири шаарларда апрелдин аягынан тартып айрым ишканалардын ишмердүүлүгүнө уруксат бериле баштаган.

Акыркы маалыматтар боюнча Алматы шаарында 1 590 киши коронавирус жуктуруп алганы аныкталды. Өлкө боюнча бул илдетке чалдыккандардын саны 5 138ге жетти.

WWW.