900 Бардыгы /

Тажикстандын Жазаларды аткаруу мамлекеттик кызматы пневмониядан камактагы төрт адам каза болгонун ырастады.

«Түрмөдө пневмониядан өлгөндөр бар. Бирок алардын «коштоочу башка оорулары» да болгон. Көбүнүн курагы 50 жаштан жогору. Бүгүнкү күндө дагы 30га жакын киши медициналык кызматкерлердин көзөмөлүндө. Алардын төртөөнүн абалы өтө оор деп бааланууда», — деди мекеменин башчысы Мансуржон Умаров.

Ал «Ислам кайра жаралуу партиясынын» камактагы мүчөсү Рахматулло Ражаб менен өлкөнүн мурдагы өнөр-жай министри Зайд Саидовдун саламаттыгы начарлап, ооруканага которулганын кошумчалалды. «Алардын дене табы жогорулап, ооруканага которулган. Азыр абалдары жакшы, өз алдынча басып жүрүшөт», — деди Умаров.

Буга чейин Зайд Саидовдун уулу атасында коронавирустун белгилери бар экенин, саламаттыгы начарлап кеткенин билдирген.

Өткөн жумада Душанбедеги №1 абакта жаза мөөнөтүн өтөп жаткан 47 жаштагы Абдулфайза Ражабовдун каза болгону кабарланган. Түрмө жетекчилиги анын өлүмүнө пневмония себеп болгонун айтканы менен туугандары ал COVID-19дан каза болгонун билдиришүүдө.

Апрелдин аягында жарандык коом өкүлдөрү тажик бийлигин түрмөлөрдөгү эпидемиологиялык абалга көңүл бурууга чакырышкан. Алар санитардык жана дезинфекциялык чараларды күчөтүп, айрым категориядагы адамдарды бошотууну сунушташкан.

Акыркы маалыматтар боюнча Тажикстанда 729 кишинин коронавирус жуктуруп алганы аныкталды. Алардын ичинен 21 бейтап каза болду.

www.