889 Бардыгы /

Казакстандын төмөнкү палатасы (Мажилис) 20-майдагы жалпы жыйында «Тынч жыйындар жөнүндө» мыйзам долбооруна киргизилген өзгөртүүлөрдү жактырды.

Депутат Канат Мусин Сенат киргизген толуктоолор концепциясын жалпы маңызын өзгөртпөгөнүн жана айрым нормалар жакшыртылганын билдирди.

Сенат киргизген 16 өзгөртүүнүн арасында ири шаарларда, облустардын административдик борборлорунда акция өткөрүүчү жерлерди аныктоо, митинг учурунда беткап тагынуу жана башка коргонуучу куралдарды пайдалануу өңдүү сунуштар бар.

Мажилис жактыргандан кийин мыйзам долбоорун парламент кабыл алды деп эсептесе болот. Эми ал президенттин кол коюсуна жөнөтүлөт.

Буга чейин укук коргоо уюмдары бийликти мыйзам долбоорун чакыртып алууга үндөп, аны эл аралык уюмдардын экспертизасына жөнөтүүнү сунушташкан. Алар мыйзам дале болсо акция өткөрүү үчүн бийликтен «уруксат алууну» талап кыларын, тынч жыйындарды өткөрүү укугун пайдаланууда көптөгөн бюрократиялык тоскоолдуктар бар экенин билдиришкен.

Азыркы мыйзамга ылайык, казакстандыктар массалык иш-чараларды өткөрүү үчүн жергиликтүү бийликтен уруксат алышы керек. Бирок бийлик ар түрдүү шылтоолор менен митингдерди өткөрүүгө тыюу салып келет.

www.