984 Бардыгы /

Алматы шаарынын кире беришиндеги блокпостто эки полиция кызматкери каза болгондон кийин шаардык полиция департаментинин башчысы Канат Таймерденовго сөгүш жарыяланды.

Мындан тышкары мекемедеги үч башкармалыктын жетекчиси иштен алынып, жогорку кызматтагы тогуз аткаминер тартип жазасына тартылды.

Өлкөнүн ички иштер министри Ерлан Тургумбаевдин билдирүүсүндө бул кызматкерлер «жеке курам менен иштөөдө мүчүлүштүктөргө жол беришкени жана мыйзам бузган полиция өкүлдөрүнө карата өз учурунда чара көрүшпөгөнү» жазылган.

25-майда жеңил автоунаа Алматы шаарынын кире беришиндеги блокпосттун бетон тосмосун сүзүп, андан соң инерция менен патрулдук автоунаага тийген. Авариядан машиненин ичиндеги эки полиция кызматкери мерт болуп, бирөө реанимацияга жаткырылган.

Полиция департаменти жеңил автоунаанын айдоочусу мас экенин, ал камакка алынып, “Киши өлтүрүү” беренеси менен кылмыш иши козголгонун билдирген.

Айрым басылмалар мекеменин басма сөз кызматына шилтеме кылып, шектүү полицияда алты жыл иштегенин жазышкан. Каза болгон укук коргоо кызматкеринин биринин аялы кармалган адам полициянын учурдагы кызматкери болгонун, күйөөсү менен чогу иштегенин айтып чыккан.

www.