1,011 Бардыгы /

Акыркы күндөрү Түркмөнстандын Лебап облусунда мектепти аяктоо иш-чараларына акча таба албай калган бир нече бүтүрүүчү өз жанын кыйды. Бул тууралуу «Азаттык» радиосунун түркмөн кызматы билдирди.

«23-май күнү кечинде Фарап районунда бир бүтүрүүчү уй сарайга барып асынып алган. Ал бүтүрүү кечесине акча таппай жүргөн. Андан үч күн мурда ушул эле райондо дагы бир бүтүрүүчү кыз өз жанын кыйды. Ал акыркы коңгуроо салтанатына жаңы кийим сатып алууга жана бүтүрүү иш-чараларына акча таба алган эмес», — деди радионун аймактагы кабарчысы.

Анын айтымында, Дарганат районунда дагы бир бүтүрүүчү өз өмүрүнө кол салган. Анын өлүмүнө мугалимдер иш-чараларга деп сураган 400 манатты (расмий курс боюнча 114 доллар) таап бере албагандыгы себеп болгон.

«Кыздын ата-энеси аларда мындай сумманы төлөп берүүгө мүмкүнчүлүк жок экенин айтышкан. Бул жооптуу уккандан кийин кыз өз өмүрүнө кол салган», — деди кабарчы.

Буга чейин «Азаттыктын» түркмөн кызматы быйыл Ашхабад шаарындагы мектептерде бүтүрүү кечелери өтпөй турганын кабарлаган.

www.