923 Бардыгы /

Өзбекстандын Москвадагы элчилиги ачкан «Мехр» кайрымдуулук фонду Орусияда калган 786 өзбек жаранына 4,9 миллион рубль (68,9 миң доллар) өлчөмүндө акчалай жардам берди.

Өзбекстан ТИМи 14-майдан 22-майга чейин жардам алган өзбекстандыктардын 493ү Орусияда окуп жүргөн студенттер экенин билдирди.

Материалдык жардам алгандардын арасында мүмкүнчүлүгү чектелген беш жаран, эки жашка чыга элек балдары бар 32 аял, кош бойлуу жети келин жана коронавирус жуктуруп алган 13 киши бар.

Мындан тышкары Өзбекстандын Санкт-Петербургдагы консулдугу хостелде жашап жаткан 41 өзбекстандыктын жашоо акысын төлөп бергени кабарланды. Ошондой эле 18-майдан 23-майга чейин 202 муктаж үй-бүлөгө эки жумага жеткидей азык-түлүк жеткирилген.

Өзбекстандын элчилиги 14-майдан тартып Орусияда оор абалда калган жарандарга акчалай жардам берилерин билдирген.

«Бул жардам жарандын банк картасына бир жолу 12 130 рублден которуу аркылуу ишке ашырылат», — деп жазылган элчиликтин билдирүүсүндө.

«Мехр» кайрымдуулук акциясын өнөктөштөр жана демөөрчүлөр колдоп келишет.

www.