1,121 Бардыгы /

БАТКЕН. Баткен облусунун Кадамжай районундагы «Чечме» Чекара өткөрүү бекетинде Кыргыз Премьер-министринин милдетин аткаруучу, биринчи вице-премьер-министр Кубатбек Боронов Өзбекстандын Премьер-министри Абдулла Арипов менен жолугушту.

Тараптар Кыргыз-Өзбек мамлекеттик чек арасынын Чечме аймагында 2020-жылдын 31-майындагы окуяны жана чек ара аймактарындагы абалды турукташтыруунун жолдорун кенен-чонон талкуулашты. Делегация жетекчилери чырларды жергиликтүү бийлик органдарынын жана тараптардын укук коргоо органдарынын ирээтке келтирилген ишинин натыйжасында окуяны локалдаштырууга мүмкүн болгондугун баса белгилешти. Бул органдарга тыгыз кызматташтыкта мындан ары чыр-чатактарды болтурбоо максатында калк арасында түшүндүрүү иштерин жүргүзүүнү катуу тапшырышты.

Баса, 2017-жылдын 6-октябрында кол коюлган Кыргызстан менен Өзбекстандын ортосундагы чек ара аймагында ишеним чаралары боюнча Макулдашуунун жоболоруна ылайык чек арада пайда болуп жаткан маселелерди чечүү, Кыргыз-Өзбек мамлекеттик чек арасын делимитациялоо жана демаркациялоо боюнча Өкмөттөр аралык комиссиянын ишин активдештирүү макулдашууларына жетишишти. Ошондой эле делегация Башчылары жакынкы аралыкта эки тараптуу кызматташуу боюнча Кыргыз-Өзбек Өкмөттөр аралык комиссиясынын жана Кыргызстан менен Өзбекстандын чек ара аймактарынын ыйгарым укуктуу өкүлдөрүнүн Башчыларынын Кеңешинин кезектеги отурумдарын өткөрүүнү дагы  макулдашышты.

Сүйлөшүүлөрдүн соңунда делегация Башчылары бир күн мурун окуя болуп өткөн «Чечме» чекара өткөрүү бекетин дагы барып көрүштү. Чек ара айылдарынын аксакалдары менен жолугушушту. Жолугушуу конструктивдүү маанайда, ынак коңшулук жана стратегиялык өнөктөштүк деминде өттү.

Алишер ТОКСОНБАЕВ, өз кабарчы