Аймак

АКСЫ: НАРЫН ДАРЫЯСЫНА ЧӨККӨН БАЛАНЫ ИЗДӨӨ ИШТЕРИ ТОКТОТУЛДУ

АКСЫ: НАРЫН ДАРЫЯСЫНА ЧӨККӨН  БАЛАНЫ ИЗДӨӨ ИШТЕРИ ТОКТОТУЛДУ

 720 Бардыгы /

Үч-Коргон айыл аймагына караган Кум айылынын тургундары болгон 5 өспүрүм, талаада жумуш жасап балгон соң Нарын дарыясына келип жуунуп жатып бирөөсү чөгүп кеткен. Сууга чөккөн 17 жаштагы баланы издөө иштери токтотулду.

Таш-Көмүр шаарында жайгашкан ӨКМдин алдындагы №2 өзүнчө издөө куткаруу отрядынын командири Мырза Эргешовдун айтымында 2 чакырымдай жерди карап бирок баланы таба албай коюшкан.

“14-июнь күнү саат 11лер чамасында бизге Үч-Коргон айыл аймагынан чакыруу түштү. 8 куткаруучу окуя болгон жерге барып, күбөлөр көрсөткөн жайларды издеп баштаган. Жергиликтүү бийлик өкүлдөрү Үч-Коргон ГЭСи менен байланышып сууну азайтып беришти, ал учурда 2 суучул дарыянын 20 метр терең жерине чейин түшүп өспүрүмдү издешти. Жалпы 2 чакырымдай жерди кароодон өткөрдүк, бирок таба алган жокпуз. Куткаруучулар 2 күн аралыгында таңкы саат 7ден, кечки 8ге чейин издеп, туугандарынын макулдугу менен издөө иштерин токтоттук. Буга чейин деле аталган дарыяга аккан адамдар Өзбекстан республикасынын аймагынан табылган учурлар болгон”,-деди Эргешов.

Ал эми Үч-Коргон айыл аймагынын башчысы Талантбек Эркинов учурда бул кырсык боюнча коңшу Өзбекстан өлкөсүнүн өзгөчө кырдаалдар министрлигинин кызматкерлерине кабарлап, өспүрүмдүн денесин коңшу өлкөнүн аймагынын издөө иштери болуп жатканын билдирди. 

“Сөөгү изделип жаткан бала сууга жуунуп жатып, суунун айланпасына туш келип, аны суу түбүнө тартып кетет, аны байкаган досу жакын барып, аны куткарууга аракеттенгенде ал да суу түбүнө тартылып, бирок  жээкке чыгат. Үч-Коргон ГЭСи менен райондук деңгээлде сүйлөшүү жүрүп сууну азайтып, издөө иштери жүрдү. Сөөктү табууга айыл тургундары, баланын туугандары, ӨКМдин куткаруучулары жана айыл өкмөттүн кызматкерлери тартылды, бирок майнап чыккан жок. Азыр Өзбекстан мамлекетинин ӨКМ менен сүйлөшүү жүрүп, коңшу өлкөнүн аймагында издөө иштери жүрүп жатат, эгер өспүрүмдүн сөөгү табылса бизге кабарлашат”,- дейт айыл өкмөт башчы Т. Эркинов.

Анын айтымында сууга чөккөн бала 4 бир туугандын улуусу. Ал күнү классташтары менен досунун талаасына жардамдашып, күн ысып кеткендиктен дарыяга чөмүлгөнү келип кырсыктап калган.

“Аймак”

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17