1,112 Бардыгы /

Аксы райондун Ак-Суу айыл аймагынын тургуну  коронавирус инфекциясынан каза болду. 60 жаштагы аялдын жаназасына 10дой гана жакын туугандары катышат. Бул тууралуу райондун акиминин биринчи орун басары Нуртаза Мамбетов билдирди.

Каза болгон 1960-жылкы Б. М аттуу жаран 13-июнь күнү абалы начарлап Ак-Суу аймактык ооруканасына кайрылган.  Андан коронавирус оорусунун клиникалык белгилери байкалган, бирок ага тест тапшырганда оору аныкталбаган. 

Анын саламаттыгына ак халатчандар 3 күн байкоо жүргүзүшкөндөн кийин, бейтапты Аксы аймактык ооруканасынын жугуштуу оорулар бөлүмүнө жеткирип, андан ПЦР анализ алынганда илдет аныкталган. Бейтап менен байланышта болгон 56 адам үй обсервациясына алынган.

“18-июнь күнү бейтап Ноокен райондук ооруканасынын жугуштуу оорулар бөлүмүнө жеткирилип, дарыланып жаткан. Кечээ кечинде анын абалы начарлап, каза болду. Учурда райондогу эки мобилдүү группанын бири Ноокен районунан тургунубуздун сөөгүн Ак-Суу айыл аймагына алып келүүдө, ал эми экинчи мобилдүү группа маркумдун жайын даярдап, ага жакын болгон 10 адамга атайын коргоочу кийимдерди кийгизип, жаназага даярданып жатышат”,-дейт акимдин орун басары Н. Мамбетов.

Мындан сырткары ал учурда Аксы району боюнча 74 адам үй обсервациясында экенин айтты.

“Аймак”