Аймак

СУЗАКТА ЖЕКЕ ИШКЕР 40 ОРУНДУУ КҮНДҮЗГҮ СТАЦИОНАР АЧТЫ

СУЗАКТА ЖЕКЕ ИШКЕР 40 ОРУНДУУ КҮНДҮЗГҮ СТАЦИОНАР АЧТЫ

 978 Бардыгы /

Сузак районунун Кызыл-Туу айыл өкмөтүнө караган Кызыл-Сеңир айылында 40 орундуу бардык шарты менен күндүзгү стационар ишке кирди. Стационарды ачкан жеке ишкер Муктар Зулпукаровдун айтымында, дарылоочу жайды ачуу сунушу ата-энесинен жана тургундардан түшкөн. Анткени, аталган айылда күндүзгү стационар жок болуп, тургундар алыскы аймактык ооруканаларга барып жатышкан.

Стационарды ачуу сунушу ата-энемден түштү. Анткени алар азыр үйдө обсервацияда жатышат. Мени чакырып, “элибизди бул илдеттен сактап калалы, абал оор болуп жатат” – деди. Айыл тургундары да айыл башчыларына стационар ачуу сунушун беришкен экен. Ушул эки нерсе себеп болуп, үй-бүлөбүз менен келишип ачтык.

Жергиликтүү бийлик 40 орундуу стационарды 6 медицина кызматкери менен камсыздап берди. Биз тараптан бир миллионго жакын каражат сарпталган бул стационарда бейтаптар үчүн бардык шарт каралды. Керектүү медициналык жабдуулар, дары-дармектер, 4 кычкылтек концентратору айтор медициналык бардык шаймандар алынды. Бул жердеги мед кызматкерлердин тамак-аш, маянасын да биз көтөрүп жатабыз” – дейт жеке ишкер Муктар ЗУЛПУКАРОВ.

Эртең мененки 8:00дөн кечки саат 20:00гө чейин иштеген стационарга эки тез жардам унаасы да каралды. Бири күндүзү оор абалдагы бейтаптарды аймактык ооруканаларга жеткирсе, экинчиси түнү бою мобилдик топ менен оорулууларды тейлемекчи.

Белгилей кетсек, аталган айыл аймакта күндүзгү стационар жок болуп, тургундар алыскы аймактык ооруканаларга барып жатышкан. Ал эми Сузак районунда пандемия менен күрөшүүдө бейтаптарга орун маселеси курч болуп жаткан. Облус аймагында жалпы 139 күндүзгү стационар ачылып, учурда 2265 керебеттик орундар даярдалган.

Бүбүсара ОРОЗАЛИЕВА, “Аймак”

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17